KERSIE-EN-ROOS-GAATJIESKOEK
Bak self (of koop) ’n plaatkoek en toor dit om in ’n Swartwoud-droom met ’n paar eenvoudige ekstras.
Maak 1 koek • Voorbereiding: 15 minute • Baktyd: 45 minute • Oondtemperatuur: 160 °C
• 6 eiers, geskei
• 500 ml strooisuiker
• 250 ml sonneblomolie
• 250 ml koffie, warm
• 500 ml koekmeel, gesif
• 30 ml kakao, gesif
• 30 ml bakpoeier
• ’n knippie sout
VULSEL
• 125 ml kersie- of bessiekonfyt
• 90 ml Nutella of soortgelyke sjokoladesmeer
• 250 ml room
• sowat 15 ml roosstroop (sien wenk)
• 1 Flake-sjokolade, in splinters gebreek
• 200 g vars kersies
• ’n strooisel vars mentblare
Bak eers die koek:
Voorverhit die oond. Voer ’n reghoekige oondbak met bakpapier uit en spuit met kleefwerende kossproei. Klits die eierwitte tot net-net styf, maar nie droog nie. Gebruik nou dieselfde klitser op hoë spoed om die eiergele en suiker vir 10 minute saam te klits. Voeg die olie en koffie by, gevolg deur die droë bestanddele, en vou alles saam tot net gemeng. Vou laaste die eierwitte deur die beslag en giet dit in die voorbereide pan. Bak die koek tot ’n toetspen skoon uitkom (sowat 45 minute).
1 Laat die koek heeltemal afkoel. Druk met die agterkant van ’n houtlepel gaatjies oral oor die oppervlak. (Of druk een in elke blokkie soos jy dit gaan sny.)
2 Spuit of skep konfyt in elke gaatjie.
3 Klits die sjokoladesmeer met net genoeg kookwater tot loperig en giet dit oor die koek.
4 Klits die room en roosstroop saam tot styf. Skep of spuit roomrosette oor die koek.
5 Versier die koek met sjokoladesplinters, kersies en vars mentblare, en sit dit dadelik voor.
Wenk As jy nie roosstroop het nie, geur die room met rooswater en versiersuiker. ’n Paar druppels pienk voedselkleursel is opsioneel.