Nat vs. droë kos

Danél van Wyk van Gqeberha skryf Ek is nie seker of my hond droë of nat kos moet kry nie. Is dit waar dat nat kos sleg vir hulle tande is? Dr. Elizna Boag, veearts by Montego Pet Nutrition, antwoord Dit kan wel moeilik wees om die regte dieet vir jou wolhaarmaats te kies, en troeteldier eienaars bevind hulle dikwels voor die keuse tussen nat en droë kos. Albei opsies het hul voordele en die besluit berus op faktore soos die dier se gesondheid, ouderdom en individuele voorkeure. Talle eienaars kombineer graag die twee deur nat kos as bederfie of ter aanvulling van hul diere se hoofsaaklik droë dieet te gee. Wat wel belangrik is, is dat droë kos waarby nat kos gemeng is, gouer bederf; enige reste van die mengsel wat in jou dier se bak oorbly, moet dus weggegooi word.

DROË KOS is die meer algemene keuse vir troeteldier eienaars. Dit bestaan uit’ n mengsel van vleis- en graansoorte en ander bestanddele, en het ’n heelwat laer voginhoud as nat kos.

Hier volg van die voordele van droë kos:

• Tandgesondheid Die droë, knarsige tekstuur van korrels help om tandgesondheid te bevorder aangesien die kou-aksie daartoe bydra dat minder tandsteen opbou.

• Gerief Droë kos word makliker geberg en kan vir lang tye oop staan sonder dat dit sleg word.

•Kostedoeltreffend Oor die algemeen werk droë kos goedkoper uit vir eienaars met meer as een troeteldier.

• Variasie Droë kos kom in ’n verskeidenheid geure en formules wat vir bepaalde dieetbehoeftes en -voorkeure voorsiening maak.

NAT KOS, meestal in die vorm van blikkieskos, het ’n hoër voginhoud. Dit bestaan gewoonlik uit ’n mengsel van vleis, groente en grane in ’n sous of jellierige medium, en het dié voordele:

• Hidrasie Een van die belangrikste voordele van nat kos is die hidrasie-eienskappe. Die sagte tekstuur maak dit makliker om te kou vir senior diere en dié met tandprobleme.

• Smaak Danksy die sterk aroma en geurige tekstuur van nat kos vind baie diere dit smaakliker – daarom ’n goeie keuse as jou troeteldier vol fiemies is.

• Verteerbaarheid Die voginhoud bevorder vertering, wat voordelig kan wees vir diere met sensitiewe mae.

• Gewigbestuur Beheerde porsiegroottes kan help met gewigbestuur, aangesien nat kos dikwels minder kilojoules as droë kos bevat.

KONTAK montego.co.za