’n Passie vir al wat ’n plant is
In die lente is die sierlike bloureën bo die stoep ’n groot apploustrekker. “Dit het lank gevat voor hy begin blom het, en vanjaar was hy op sy mooiste nog,” sê Nan.
“Ek vermoed dit het te doen met hoe ons dit teruggesnoei het. Verlede jaar het ons te drasties gesnoei en het hy nie goed geblom nie.”
Nan kry haar liefde vir tuinmaak van haar ma. “Sy het ’n tuin van bykans ’n halwe hektaar gehad, en dis hoe ek haar onthou: in die tuin, tuinslang in die hand, terwyl sy haar plante tydsaam staan en natmaak,” vertel Nan, wat vir so lank as wat sy kan onthou, besig is met botaniese dinge.
“Met my eerste besigheid het ek vetplante in ’n kweekhuis gekweek, in potjies uitgeplant en aan kwekerye verkoop.” Daarna het sy ’n pottebakkery, Pottery by Nan, begin en pragtige terracottapotte gemaak wat sy aan kwekerye en bloemiste verskaf het. “Ek was nog maar altyd op een of ander manier omring deur plante.”
Alan se destydse onderneming, Trader’s Workshop, het tuinmeubels en -bykomstighede van smeeyster gemaak, wat goed by die potte aangesluit het. Hulle het hulle in die kleinhandel begewe en hul gewilde Simply French-winkels in verskeie sentrums in Johannesburg oopgemaak. “Ons moes lang ure werk, wat tot my belangstelling in vetplante gelei het. Ek het net nie meer genoeg tyd gehad om al die potte gereeld nat te gooi nie, toe begin ek met iets wat ’n bietjie afskeep sou oorleef,” sê Nan, wat nou ’n groot versameling vetplante in potte voor hul huis het.
Die voordeel van die tuin is dat dit relatief min onderhoud verg en die struktuur en immergroen plante sorg dat dit heeljaar mooi is. – Nan