Uit hul notaboek

Vernuftige ontwerpplanne en deursettingsvermoë is die hoofbestanddele vir ’n geslaagde opknap.

Lynette se opknapgeheime

• Verf is ’n wonderlike en relatief goedkoop manier om warmte, diepte en atmosfeer te skep. Moenie bang wees vir kleur en donker mure nie; dit verander ’n vertrek heeltemal.

• Skep ’n fokusmuur in elke vertrek. Jy kan ’n donkerder kontrasterende verfkleur, plakpapier of iets soos ’n spieël gebruik. In my kombuis skep die spieël wat as spatvlak bo die stoof dien so ’n fokuspunt. Enigiemand kan ’n doodgewone ou spieël ’n vintage-voorkoms gee met verf.

• Kontras is belangrik, soos die donker mure wat ek oral teen wit detail afspeel. In die badkamer is dit die houtpanele; in die kombuis die werkvlakke.

• Ons het geld bespaar deur nie die oorspronklike loodgieters- en elektriese punte te skuif nie. Ons het ook die ou stort se koperpype en stortkop weer gebruik, net soos die ou Victoriaanse bad en sy krane, wat bloot skoongemaak is.

• As jy wil moed verloor, onthou: Enigiets is moontlik met deursettingsvermoë.

• Onder konstante toesig werk kontrakteurs vinniger en doeltreffender, en verkort jy jou wagtyd.

Lynette het ’n vars groen palet vir die binnehof (oorkant) se stoffeermateriaal gekies. “Dit lyk koel en komplementeer die houtdetail,” sê sy. Colin het die bankie met pakplek en plantbokse self gemaak van behandelde dennehout. Buitelugmat van Hertex;...