In Peter Rimell se tuin is die werk nooit klaar nie. Ná dertien jaar van tuinmaak is hy steeds aan die verander ...
Peter, ’n vryskutfotograaf, vertel met dié foto’s sy tuin se storie. Die Rimells se huis is meer as 200 jaar oud; hiervan getuig die kleibakstene in die oorspronklike gebou se kern. Oor die jare is baie aanbouings en byvoegings tot die huis en tuin gedoen, maar dit het steeds ’n wonderlik ouwêreldse atmosfeer – iets wat Peter ook in die tuin probeer behou.
“Ons is gelukkig dat hier ’n paar groot gevestigde bome was toe ons ingetrek het,” gesels hy. “Ek wens net meer van hulle was inheems. Dié bome, asook die bloureën wat in hulle opgroei en in die lente oortrek is met pers blomme, dra alles by tot die wonderlike gevoel van ons tuin. Ek het ook ’n ou put op die erf ontdek, dit skoongemaak en nuwe lewe daarin geblaas. Daar’s nie veel water in nie, maar elke druppel tel.” >>
Dié boom vorm ’n natuurlike sambreel aan die een kant van die swembad. In die lente dra dit pragtige rooi blomme wat nektarliewende voëls lok. Die peule is wel ’n probleem vir die outomatiese swembadskoonmaker! Peter het ’n saailing onder die moederboom ontdek en ’n bonsai daarvan gemaak.