Besoek ons skoutuin by Garden World se Lentefees!
Aangespoor deur die begeerte om die daaglikse gejaag te ontsnap, met meer werk om te doen en minder tyd om net uit te span, is Tuis se skoutuin by die Garden Worldlentefees in Johannesburg die perfekte ruimte om jou batterye te herlaai en nuwe energie te kry.
Die tuin heet “De-stress hour” en is die handewerk van Asavela Yashe en Olaotse George Moletsane, junior dosente in ornamentele tuinbou aan Unisa. Dis ontwerp as ’n plek waar jy asem kan skep, al is dit net vir ’n uur.
Die tuin het ’n minimalistiese gevoel, wat vrede en bepeinsing aanmoedig, en die plante is gekies vir die manier waarop hul kleur, tekstuur en vorm die vreedsame omgewing versterk.
Twee ovaalvormige sitareas met leiklip-plaveisel en ’n wandelpaadjie moedig besoekers aan om ’n blaaskans te neem. ’n Abstrakte muurskildery bied visuele afleiding, terwyl die kalmerende klanke van ’n waterfokuspunt bydra tot die rustige gevoel van die tuin. “’n Kombinasie van sand, klippe en bamboes versterk die verbinding met die natuur,” sê Olaotse.
by Garden World se Lentefees ‘n Mooi tuin is die perfekte teenvoeter vir ‘n stresvolle leefstyl.