[CARLA OOR DEKOR]
Ondanks ’n eklektiese mengsel van erfstukke, versamelgoed, markvondste en vakansiekopies het Carla se dekor ’n stylvolle, samehorige gevoel. Sy vertel hoe sy dit regkry en haar dekorpalet van swart en wit met spatsels metaalkleure laat werk:
• As ’n ding jou pla of nie werk nie, kleur of verf dit. Dit geld ook vir erfstukke, want jou dekor moet jóú storie vertel, nie iemand anders s’n nie.
• Dis makliker om met wit gestoffeerde meubels saam te leef as wat dit lyk. Ons het drie honde, daarom is los oortreksels en ’n vlekverwyderaar vir rooiwynkolle ’n moet.
• ’n Verskeidenheid teksture – leer, linne, koper en geverfde hout – maak ’n neutrale palet soos myne interessanter.
• Ek hou van dramatiese kontras – soos die Persiese mat op die wit sementvloer in ons slaapkamer, of die moderne, geometriese matte op die ou houtvloere.
• Glas, kristal, silwer en koper is ’n moet vir ’n bietjie glans. En ek is versot op spieëls. Dit staan oral rond – op my vloere, in die spens en sommer buite ook.