Gekrummelde varksteaks
Ja, jy kan klaar gekrummelde schnitzels by die supermark koop vir ’n vinnige ete, maar glo my, die kitsproduk gaan nie kan kers vashou by die ware Jakob nie. Genoeg vir 4 Bereidingstyd: 40 minute Gaarmaaktyd: 20 minute
• 4 x 200g-varksteaks • sowat 45ml vars suurlemoensap • sowat 500ml droë broodkrummels, verkieslik tuisgemaak • ’n knippie droë Italiaanse kruie • pietersielie • 125ml meel • 2 eiers, geklits • 30ml water • 15ml olie • botter en olie vir vlakbraai SAMPIOENSOUS • 30ml botter • 400g gemengde sampioene, grofgekap • 2 heel knoffelhuisies • gerasperde suurlemoenskil na smaak • 15ml Dijon-mosterd • 5 takkies tiemie • 250ml crème fraîche (of suurroom) • 30ml gekapte pietersielie • suurlemoensap
1 Gebruik ’n vleishamer en kap die vleis plat; die steaks moet omtrent 1 cm dik wees. Sprinkel die suurlemoensap oor en marineer in ’n plat bak vir sowat 15 minute. Meng intussen die broodkrummels met die Italiaanse kruie en pietersielie en kry die res van die bestanddele gereed. 2 Geur dan die vleis met sout en varsgemaalde swartpeper en bedek dit met ’n lagie meel. Klits die eier, water en olie saam. Skud die oortollige meel van die vleisstukke af en doop dit eers in die eier en dan in die broodkrummels. Sit dit in die yskas vir sowat 20 minute om seker te maak die krummellaag sit goed vas.
3 Maak intussen die sampioensous Smelt die botter in ’n pan en braai die sampioene en knoffel. Moenie haastig wees of te veel roer nie – jy wil hê die sampioene moet goudbruin word. Skep die knoffel uit en gooi weg. Geur die sampioene goed met sout, peper en suurlemoenskil. Roer die mosterd, tiemie, crème fraîche en pietersielie by en verhit tot deurwarm. Geur laaste met ’n skeut suurlemoensap en hou warm.
4 Smelt ’n klont botter en ’n skeut olyfolie in ’n pan en vlakbraai die steaks tot goudbruin alkant en deurgaar. Die braaityd gaan afhang van die dikte – toets en maak seker as jy twyfel. Sit dadelik voor met die sampioensous en jou gunsteling-stysel (ek hou van kapokaartappels, maar rys of selfs pasta is ook heerlik) en groente soos kool en ertjies. >>