Dekordilemma
As jou begroting dit toelaat, vervang die bestaande deure met nuwe profieldeure; dis bekostigbaar en sal dadelik ’n merkbare verskil maak.
Die stilis Margaux Tait antwoord Gange kry baie voetverkeer, maar staan gewoonlik laaste in die ry wanneer dit by ’n huis se opknap kom. Dit behoort regtig nie afgeskeep te word nie – dit gee immers aan besoekers ’n eerste indruk van jou huis. Omdat jou dogter nie ’n groot begroting het nie, sal stilering pleks van strukturele veranderinge die ding moet doen. Hier is ’n paar voorstelle:
1 VISUELE TREFKRAG
Begin deur die mure met kunswerke of foto’s te versier. Skep visuele ritme met eenvormige rame en ewe veel oop ruimte tussen-in. As jy iets meer aweregs verkies, gebruik ’n verskeidenheid rame; MRP Home verkoop bekostigbare rame in alle groottes en vorms. As ’n versameling rame jou nie aanstaan nie, oorweeg ’n eenvoudige prentlys. Dis goedkoop om te installeer en baie nuttig, want buiten kunswerke kan jy ook vintage-klere of selfs hoede met hake daaraan hang en dit so uitstal. Die moontlikhede is legio!
2 BELIGTING
Kies ’n ganglig wat by jou huis se styl pas. As jy ’n paar rand wil bespaar, gaan snuffel rond by naweek markte, tweedehands winkels of selfs garage-uitverkopings, waar jy maklik’ n winskoop sal raakloop. Kyk uit vir ligte met ’n retro-ontwerp; dis tydloos en nou hoog in die mode. Jy sal nie glo watter verskil ’n nuwe lamp sal maak nie; dis soos nuwe handvatsels wat ’n ou meubelstuk oombliklik nuut laat lyk!
3 FOKUS
Omskep die muur met die hoofslaapkamer se deur aan die einde van die gang in ’n fokuspunt met ’n laag verf in ’n ander skakering of kleur. Gebruik die ruimte bo die deur kreatief: ’n Ou reklamebord kan ’n speelse element verskaf; of as jy ’n meer natuurlike gevoel wil skep, is ’n stuk dryfhout nommerpas. Dit moet die oog tref en persoonlikheid hê.
4 MONTEER MUURPANELE
Vir ’n titsel elegansie kan jy ook die onderste helfte van die mure beklee. Hou dit eenvoudig en maak seker die panele is almal ewe hoog. Oorweeg Nutec-borde met ’n tong-en-groef-afwerking (jy heg dit aan die muur met houtstroke), regte tong-en-groef-denneplanke (dis duurder) of die groot verskeidenheid polistireen-panele van DAS Products (gaan kyk by jou plaaslike ysterwarewinkel; selfs hul plafonpanele sal goed werk teen die muur). Verf die panele in ’n effens donkerder skakering as die mure – jy sal dadelik die verskil sien. Jy kan steeds ’n galerymuur bo die panele skep.
5 DIE VLOER
Versag die twee vloerbedekkings met ’n lopermat tot tyd en wyl die nuwe vloer geïnstalleer kan word. Omdat die gang so lank is, sal jy waarskynlik twee matte nodig hê – gebruik identiese matte vir eenvormigheid.