3 Kolwyntjies met versuikerde blomblare

• 125g botter • 250ml Huletts White Sugar • 2 groot eiers • 250g bruismeel • 5ml bakpoeier • 5ml vanieljegeursel • 250ml melk VERSIERSEL • 300ml Huletts Icing Sugar, gesif • sowat 15ml rooswater VERSUIKERDE ROOSBLARE • vars roosblare • 1 eierwit • Huletts Castor Sugar

1 Klits die botter en suiker saam tot romerig. Voeg die eiers by en klits goed.

2 Sif die meel en bakpoeier saam; voeg die vanielje by die melk. Vou dan die meel om die beurt met die melk by die bottermengsel in.

3 Skep die beslag in kolwyntjiedoppies en bak teen 190 °C vir 10–12 minute of tot ’n toetspen skoon uit die middel van ’n kolwyntjie kom. Verkoel op ’n draadrak.

4 Maak die versiersel Meng ’n bietjie rooswater op ’n slag by die versiersuiker in tot die mengsel glad is, maar nie te loperig nie. Doop die bokante van die kolwyntjies in die versiersel en laat enige oorskiet afdrup. Versier met ’n paar strooiversiersels as jy wil en laat die versiersel stol.

5 Maak die versuikerde roosblare Verf die blare een-een met ’n dun lagie eierwit aan albei kante en strooi ruim strooisuiker oor. Sit eenkant om te verhard en versier die kolwyntjies daarmee.