Kop kap aan
Jy kan maar sê ons is gek, maar ons wonder of Sharon se terapeut by die Fairview-sanatorium al haar varkies op hok het.
Weekdae e.tv (*194) 09:00
Fairview is nie die veilige hawe wat Sharon (Sharon Case) gehoop het dit sou wees nie toe sy op Vrydag 3 Junie daar opgeneem is. Haar mede-pasiënt Patty Williams (Stacy Haiduk) – haar verloofde Dylan (Steve Burton) se kriminele gek tante – ontstel Sharon met haar [Patty se] obsessie om vriende met Sharon te wees en die gesprekke wat Patty met haar speeldingkatjie voer. Maar die regte gevaar by Fairview is nie die koekoes moordenaar Patty nie. Sharon se terapeut dr. Anderson (Elizabeth Bogush) laat alarmklokkies lui . . .
DIAGNOSE: AGTERDOG
Op Maandag 13 Junie gaan klik Patty by dr. Anderson dat Sharon oor haar swangerskap jok nadat sy Sharon en haar dogter Mariah (Camryn Grimes) afgeluister het toe hulle Sharon se miskraam op Maandag 9 Mei bespreek het. Die dokter waarsku Patty om haar stil te gedra en op Vrydag 17 Junie neem dr. Anderson ’n bloedmonster by Sharon om kamtig vas te stel hoe sy by haar nuwe bipolêre medisyne aanpas. Maar dr. Anderson doen ook ’n swangerskaptoets en sê vir Patty Sharon verwag inderwaarheid ’n baba – vertroulike inligting wat nie net niks met Patty te doen het nie, maar dit weerspreek wat Sharon se oorspronklike dokter op Maandag 30 Mei vir haar gesê het.
Terwyl ons kopkrap en wonder of Dylan en Sharon op ’n manier vinnig agter die skerms gekafoefel het op pad na die sanatorium, sê Patty vir Sharon sy het gedink Sharon het oor die baba gejok, maar dr. Anderson se toetse het bewys Sharon is regtig swanger. Dit klink mos ’n bietjie verdag, of hoe?