BOEIENDE BOEK
Die skrywer Deon Meyer se spanningsroman Orion, waarop die gelyknamige TV-reeks gegrond is, het ’n platform vir haar gebied om haar karakter te help ontgin. “Die verhaal is so boeiend, ek kon die boek nie neersit nie en het dit binne 48 uur deurgelees. Deon se karakterbeskrywings is puik en jy weet presies wie Hoop Beneke is wanneer jy die boek klaar gelees het.”
Erica sê sy kan verstaan waarom Orion vandag ná ’n dekade nog soveel aanklank by kykers vind. “Die verhaal het al die bestanddele en menslike emosies wat dit immergroen maak. Die interaksie en verhoudings van die hoofkarakters wat hulle in ’n slegte spiraal bevind en die uiteindelike genesing maak die reeks aangrypend.”
FORMIDABELE VROUE
Erica geniet dit om aan al die karakters wat sy vertolk te slyp en hulle vroue van vlees en bloed te maak. Sy het onlangs gewerk aan die derde seisoen van kykNET se speurreeks Die Boland Moorde (nog nie geskeduleer nie), waarin sy die rol van die sjef Charlotte vertolk. Tans werk sy hard aan die rol van nog ’n polisievrou, kapt. Heidi Holland, in die fliek Bloodline, met Darrell Roodt as regisseur (uitreikdatum nog nie bekend nie). “Heidi is ook ’n tawwe koekie,” verklap Erica.
Die bedrywige aktrise se volgende projek is ’n kortfliek (titel nog nie bekend nie) wat binnekort deur die regisseur Mathys Boshoff verfilm word. Dit sal later vanjaar vertoon word. “Ek speel ’n kwadrupleeg en het nog baie huiswerk om te doen,” gesels Erica oor die rol, en voeg by sy’s baie opgewonde oor die uitdaging. Maar vir eers fokus Erica op haar karakter Heidi Holland voor sy onder die vel van nog ’n formidabele vrou inkruip.