ANDER KARAKTERS

Ralie (Elandri Stricker, ook gesien as Marghereet in die dramareeks Dit Wat Stom Is in 2005):

’n Joernalis van die SABC wat met Andries ’n onderhoud voer oor sy plakkery. Sy ken hom van kleins af en vermoed hy is haar pa omdat hy iets vir haar ma voel.

Mev. Hertzkovitz (Annie Robinson):

’n Snobistiese rooinek wat trots is op haar sogenaamde betrokkenheid by die struggle tydens apartheid. Sy het die grond langs haar huis, waar Andries nou plak, as ’n bewaringsgebied vir ’n rare skoenlapperspesie laat verklaar. Sy kla oor Andries wat volgens haar pervers is en homself ontbloot omdat hy net in sy reënjas gesien word.

Heila Melck (Elize Cawood, Susanna van 2013-2015 in Binnelanders, 2004-nou):

Andries se eksvrou. Sy is ook verbitterd, want ná 25 jaar se getroude lewe het sy alles verloor. Sy gee nog baie vir Andries om en bring gereeld vir hom kruideniersware.

Paulus Tshukudu (Fezile Mpela, Ike in Getroud Met Rugby – Die Sepie 2016-nou):

Andries se gewese plaasbestuurder aan wie hy sy plaas verloor het. In episode 2 (10 Augustus) kom plak Paulus saam met Andries nadat hy deur die Tswanas ingeloop is.

Die burgermeester (Sello Sebotsane, past. Morake in Rockville 2013-nou):

Die Joburgse burgemeester is paranoïes oor Andries wat op regeringsgrond plak en is bekommerd as hy Andries verwyder, gaan hy publieke oproer veroorsaak omdat Andries wit is.

Milly van der Westhuizen (Nazli George, Dawn in 2014 in Binnelanders 2004-nou):

Sy moet vir die burgemeester meer oor Andries uitvind.

Sandy Hall (Alvin Bruinders, Sheridan in Vetkoekpaleis 1996-2000):

’n Skollie en kansvatter wat ons eers in episode 6 (7 September) leer ken. Hy probeer meer inligting uit Ralie kry oor hoe hy Andries om die bos kan lei.