Hollywood
Rami Malek, die karakter Elliot Alderson in Mr. Robot, gee nuwe betekenis aan die onbeholpe rekenaar-bleeksiel.
Mr. Robot
Seisoen 2 Donderdae M-Net Edge (*102) 21:00
Mr. Robot (2015-nou) het almal verras. Min mense het verwag ’n rillerreeks oor kuberkrakers en -terrorisme sou ’n treffer wees en ’n kultusaanhang opbou. Daarby het dit tot vele toekennings gelei vir die reeksster Rami Malek (as Elliot Alderson, die depressiewe, dwelmverslaafde ekspert oor kubersekuriteit) en Christian Slater (as Elliot se oorlede pa en die kuberterroris genaamd Mr. Robot). Mr. Robot is ’n donker en gekompliseerde storie, vol skokkende kinkels in die kabel, soos die onthulling dat Elliot en Mr. Robot dieselfde persoon is. Dis ’n ingewikkelde storielyn om te volg – dankie tog ons kon die 35-jarige Rami oor die reeks uitvra!
Dis taamlik ongewoon in die bedryf dat jy al die episodes se draaiboeke vooraf gekry het. Het dit die manier verander waarop jy speel? Om alles voor die tyd te kry was die vereiste van die ateljee. Met dit tot jou beskikking kon ’n mens ’n pad vir jou karakter uitstippel. Elliot beweeg na baie donker plekke – ek het aan die einde van seisoen 1 gedink ek het hom
onder die knie, maar toe ek die draaiboeke [vir seisoen 2] lees, het ek besef ek raak nog net aan die oppervlak van wie hierdie ou is. Soos die verhouding tot Mr. Robot ontvou, is daar soveel meer om te ontgin. Kykers sien hoe Elliot begin besef en aanvaar waar hy hom nou in sy werklikheid bevind. Elliot en sy kuberkraker-groep is randfigure.
Voel jy soos ’n buitestander? ’n Bietjie minder as toe ek aan Mr. Robot begin werk het. Ek het daaraan gedink toe hulle besig was om die spelers te kies en ek my bedenkinge gehad het of ek die rol sou kry, veral weens my Egiptiese afkoms. Dit sou ’n waagstuk wees omdat ek nie ’n bekende naam was nie, maar danksy die veranderende vermaakbedryf het ek my groot kans gekry. As tiener het ek in baie opsigte soos ’n buitestander gevoel, want ek wou ’n akteur word en al die ander kinders het heeltemal verskillende aspirasies gehad. Ek kom uit ’n wêreld waar verwag is ek sou ’n dokter of prokureur word, en my familie het nooit gedink toneelspeel sal die winsgewendste en maklikste beroep wees nie. En dit is nie, tot jy ’n sekere punt bereik. Watter reaksie kry jy van die reeks se fans? Ek is die trotste op die terugvoering van mense met geestesversteurings of diegene wat eensaam en alleen is of wat voel hulle beskik nie oor die vermoë om ’n verskil te maak nie.
Dink jy Elliot is ’n goeie ou? Dis ’n moeilike vraag. Ek dink Elliot het ’n sterk morele kern en hy het sy etiese kode – kykers sal sien hoe hy die seisoen nadink oor wat hy gedoen het en sy optrede bevraagteken. Dis cool, want dit sal elke aanhanger self laat wonder en laat nadink oor hul optrede . . .
Jy’t voorheen gesê jou werk is jou lewe, maar hoe het jou lewe werklik verander van
weë hierdie reeks? Nogal taamlik. Ek was by die Met-bal saam met Anna Wintour [die befaamde Vogue-tydskrifredakteur] en ek het nooit verwag dit sou gebeur nie. Die meisies in ons program trek graag spoggerig aan, maar ek’s toe die een wat na die Met-bal gaan. [Lag.] Sulke dinge is ongelooflik.
Hoe is jou kennis van rekenaars, die tegnologie en kuberkrakery? Nie baie goed nie. [Lag.] Maar ek vorder. Ek dink daardie aspekte is die beste van my toneelspel, want dis iets waarmee ek nie vertroud is nie. Maar ek het hulp – ons het baie tegnologiese adviseurs.
Jy word nou oral herken, als te danke aan Mr. Robot . . . Dis erg – toe ons begin het, kon ek in die straat afloop en niemand het geweet wie ek is nie. Die reaksie is verstommend en ek sal vir enigeen stop en tyd maak – as jy ’n aanhanger is en weet wie ek is en wie ek speel, is dit vir my baie spesiaal. Al beteken dit dit vat baie langer om by die winkel en die fliek uit te kom. [Lag.]