SUPERGELAAIDE SEPIES
“Sodra daar iets bonatuurliks in die program is, kry ons ’n hoë AR (gehoorreaksie),” sê Scandal! (2005-nou) se vervaardiger, Ilse van Hemert. “Die feit dat jy jou man kan ‘ toor’ om net vir jou oë te hê, die feit dat jy jou mededingers kan ‘ toor’ sodat iets met hulle gebeur . . . hierdie moontlikhede sorg vir fantasiese sepiestorielyne omdat jy vrye teuels het – jy kan The Daily Sun (SA se suksesvolste poniekoerant) wees. Maar hoe word dit gebruik sonder dat dit uitbuiting is?” vra Ilse. Respek en navorsing: dis die twee woorde wat telkens opgeduik het toe ons met SuidAfrikaanse sepievervaardigers gepraat het.
DIE HOE, WAAR EN HOEKOM
Respek vir ons kulturele tradisies behels dat dit korrek weergegee moet word, maar wat in die sepie gewys word, verskil na gelang van waar dit afspeel. Sepies in stede is geneig om ’n reeks praktyke te kombineer, wat die hutspot van ’n stad gevul met verskillende gelowe uitbeeld. Met sepies in landelike gebiede sal seker gemaak word die weergawe van plaaslike gelowe is so akkuraat moontlik.
Isibaya (2013-nou) speel deels in Johannesburg en deels in die Thukelavallei in KZN af, en die uitvoerende vervaardiger Desiree Markgraaff vertel: “Ons praat met baie mense wat in hierdie veld werk om te verseker ons is korrek. Dit sluit in tradisionele beoefenaars in die stad en in die Msingagebied, waar ons storie gebaseer is.”
Daarteenoor volg Scandal! (in Jo’burg se Newtown) en High Rollers (2013-nou, in Jo’burg se noordoostelike voorstede), eerder ’n benadering van veralgemening. Ilse verduidelik: “In ’n sekere gebied kan daar ’n spesifieke manier wees waarop dinge gedoen word, en in die dorpie net langsaan kan daar ’n effe ander manier van doen wees – en elkeen sal glo sy manier is die