Bedorwe brokkie
Die rigtinglose Jerome probeer alleen die mas opkom.
Ma.-Do. kykNET (*144) en kykNET & kie (*145) 18:00 en kykNET & kie 20:00
Jerome (Danny Ross) moet kelner in die Oos-Wes-restaurant speel en agter almal rondhardloop nadat sy pa, Ian (Abduraghmaan Adams), hom op Maandag 8 Augustus afgedank het. Maar die happy-golucky Jerome kruip agter sy sjarme weg en neem dit glad nie ernstig op nie. En kort voor lank is hy ’n tweede keer sonder werk.
GROOT PIEKNIEK
Jerome beskou die lewe as een groot piekniek, vertel Danny. “Hy dink dis kinderspeletjies om ’n kelner te wees. Jerome kuier amper meer as die klante in Oos-Wes en werk hom glad nie dood nie,” voeg Danny by.
Op Maandag 22 Augustus sê Jerome vir Stefan se vrou, Michelle (Greta Pietersen), hy het glad nie ’n idee wat van hom as kelner verwag word nie. Jerome draai die sjarme-kraantjies oop en is oorvriendelik met die klante, en ja, natuurlik veral die vroulike klante. “Hy maak sy eie reëls en is seker almal gaan daarvan hou. Hy is immers Jerome, en almal is mos mal oor Jerome,” sê Danny.
Oom Fasie (Johan Botha), die eie- naar van Oos-Wes, is self onkant gevang omdat Stefan (Gideon Lombard) sy joller-vriend Jerome so skielik by die restaurant aangestel het. Op Woensdag 24 Augustus neem Jerome die klantediens net té ver en oom Fasie dank hom summier af. Maar Jerome gaan nie op ’n hopie sit nie.
DIE VAN IS OCTOBER . . .
Jerome is die ewige optimis en as daar ’n terugslag is, beweeg hy noodgedwonge aan, sê Danny. “Hy het darem bietjie van sy pa se gene geërf en is altyd besig met ’n nuwe plan, hoewel sy idees meer eerbaar is as sy pa s’n.” As jy die seun van die gedugte eiendomsmakelaar Ian October is, kom dit met baie bagasie, voeg Danny by. “Die van October skep hoë verwagtinge.”
Tot dusver kon Jerome lekker op die rug van die October-van ry, maar nadat sy pa hom die deur gewys het by die werk, besef Jerome hy is op sy eie. Hy sal nou sy eie potjie moet krap.
Maar vir eers moet Jerome lig loop en nie sy bande met sy gesin heeltemal verbreek nie. Sy enigste suster, Nicci (Gerwen Simon), se groot troue met Tim (Marco Spaumer) op Donderdag 25 Augustus is net om die draai. En die partytjiedier Jerome sal hierdie feesviering vir niks in die wêreld wil misloop nie.