Konfrontasietyd
Nog geheime uit Charmaine se verlede word oopgekrap wanneer sy haar verkragting aanmeld.
Weekdae SABC2 19:00
Daar was groot verligting in die Laan toe die stom Charmaine (Vinette Ebrahim) uiteindelik aan begin September begin praat het ná haar verkragting op Donderdag 25 Augustus. Haar prokureurskoonseun Xander (Theo Jantjies) wil haar bitter graag help en moedig haar op Woensdag 14 September aan om haar verkragting by die polisie aan te meld, maar sy skop daarteen vas. En om dinge nog erger te maak vind ons uit dis nie die eerste keer dat Charmaine verkrag is nie . . .
MATRONE HET RAAD
“Xander is gefrustreerd, want hy voel hy kan nie tot Charmaine deurdring nie,” sê Theo. Hy kry ook nie veel ondersteuning van sy vrou, Vanessa (Ingrid Paulus), Charmaine se dogter, nie. Later op 14 September het die paartjie ’n hewige uitval in Xander se kantoor wanneer Vanessa hom uittrap omdat hy te veel druk op haar ma plaas. “Sy is net besorg en bang as Xander aanhou karring en Charmaine weer die verkragting moet herleef deur daaroor te praat, kan sy dalk weer stom word,” sê Ingrid.
Dieselfde dag is Charmaine in Oppiekoffie besig, maar skrik haar yskoud wanneer sy dink sy sien haar verkragter tussen die klante in die koffiewinkel. Laatmiddag kom Matrone (Annelize van der Ryst-Hattingh) vir Charmaine by Xander-hulle se woonstel kuier en probeer vir haar perspektief gee oor wat met haar gebeur het. Sy moedig Charmaine ook aan om die verkragting aan te meld, want daardeur kan sy keer dat die man dit weer doen en nog ander vroue se lewe verwoes.
GERAAMTES IN DIE KAS
Op Donderdag 15 September gaan Vanessa saam met Charmaine polisiestasie toe, waar Charmaine ’n verklaring aflê. Sy lyk uitgeput wanneer hulle na die
VERGIFNIS VIR VIVIAN
Op Vrydag 16 September besluit Charmaine om met Vivian in die inrigting te gaan praat. Vivian, wat reeds as tiener in ’n inrigting opgeneem is, het in September 2015 ontsnap en Charmaine se identiteit oorgeneem. En dis Vivian wat toe Charmaine se man, Neville (Zane Meas), doodgeskiet het. Vivian is daarna weer opgeneem, en dis die eerste keer dat Charmaine haar tweelingsuster sedertdien besoek – en ons uitvind wat dalk agter Vivian se siekte skuil.
Charmaine vra Vivian om vergifnis omdat sy haar in hul kinderjare nie beter beskerm het en nie harder probeer het om hul ma te oortuig hul ma se baas – net bekend as oom Dennis – het hulle gemolesteer en verkrag nie. Charmaine sê ook sy is jammer as dit is wat daartoe gelei het dat Vivian haar varkies verloor het.
UUR VAN AFREKENING?
Geleidelik lyk dit of Charmaine uit haar dop kruip en sterker word. Sy begin dink die enigste manier om aan te beweeg, is om oom Dennis op te spoor en te konfronteer. Dus besluit sy op Donderdag 22 September om BeaufortWes toe te gaan en hom te soek. Vanessa is glad nie gelukkig wanneer sy van haar ma se plan hoor nie. “Vanessa probeer haar oortuig om te bly, maar Charmaine is vasbeslote. En Vanessa besef om met die man te gaan praat, is dalk die enigste manier hoe Charmaine die hoofstuk in haar lewe kan afsluit,” sê Ingrid.
Charmaine spoor oom Dennis wel op. Moenie Vrydag 23 September misloop nie wanneer Charmaine hom in die oë kyk . . . Ons hou asem op!