My Plek Of Joune?
Isabel Barends, eienaar van die dekoronderneming Love Lemon Interiors in Kaapstad, het van jongs af ’n passie vir dekor. “As tiener het ek my kamer oor en oor geskuif om verskillende moontlikhede met my meubels uit te toets,” vertel Isabel. “Maar ek het eers later binneversiering as loopbaan oorweeg. Ná die geboorte van my eerste kind het ek ’n kursus in interieurontwerp gevolg en toe besef dis my passie,” voeg sy by. En nou deel sy dit met die kykers as aanbieder van ’n nuwe TV-reeks, My Plek Of Joune?
Hoekom moet huiseienaars na hierdie reeks kyk?
My Plek Of Joune? gaan nie net oor die dekor-aspek nie, maar fokus ook op die persoonlike verhoudings tussen die huisbewoners. Met elke episode kry een huismaat die geleentheid om ’n vertrek saam met my en ons nutsman, Melt van der Spuy, volgens sy of haar voorkeure in te rig.
Wat was die grootste uitdaging?
Dat ons net R10 000 en agt uur het om dit te laat gebeur. Agt uur is bitter kort om enige noemenswaardige verskil aan ’n vertrek se dekor te kan maak. Kykers sien hoe die werkers laat waai om vertrekke wat lyk of dit deur ’n orkaan getref is, in droomvertrekke te verander. Dit was ook ’n nuutjie om vir die eerste keer voor die kamera te werk.
Wat is die basiese beginsels wanneer jy ’n vertrek ’n nuwe baadjie wil gee?
Ek vind inspirasie, of dit nou in ’n kleurskakering, meubelstuk of prentjie in ’n tydskrif is, wat die persoon se styl verteenwoordig. Goeie voorbereiding lei tot ’n suksesvolle projek.
En waar kry julle die deelnemers?
Ons het kykers wat op ’n advertensie op VIA (*147) reageer het en wat voel hulle is in ’n dekor-oorlog gewikkel, gevra om in te skryf.