Celebs doen dit nou

Pulane Sekepe en Bertha le Roux laat hul drome waar word.

Seisoen 1 Dinsdae VIA (*147) 21:00

Só baie van ons sê “eendag gaan ek nog dit of dat doen”, maar kom nooit daarby uit nie. Die Jacaranda FM-aanbieder Pulane Sekepe en die aktrise en Radio Kansel-aanbieder Bertha le Roux (sy het van 2002 tot 2014 Emma in 7de Laan gespeel) het besluit om die bul by die horings te pak en hul drome te verwesenlik. Bertha wou altyd leer baldans en Pulane wil superfiks word, en albei het besluit: dis nou of nooit! Robert Kaden, publisiteitsbestuurder by VIA, vertel Nou Of Nooit fokus op ’n leefstylverandering en nie soseer op gewigsverlies nie. “Daar’s ook geen kompetisie tussen Pulane en Bertha nie,” sê hy. Die kameras volg die twee se afsonderlike reise in 13 episodes oor drie maande (Julie tot September) en wys hoe hulle bloed sweet om hul doelwitte te bereik. Pulane wou uiteindelik op Saterdag 10 September deelneem aan The Beast Challenge, ’n hindernisbaanresies in Johannesburg wat oor 10 kilometer strek. Bertha se uiteindelike doelwit was om op Saterdag 10 September haar slag in die Fred Astaire-Nasionale Danskompetisie in Johannesburg te wys. Albei die hoogtepunte sal in seisoen1 se laaste episode op Dinsdag 20 Desember 2016 gesien kan word. Hulle motiveer mekaar tydens die reeks en woon saam die motiveringsessies by die lewensafrigter Elzaan van der Merwe by. Albei erken dit het baie dissipline geverg om hul doel te bereik, maar aan die einde van die dag is die smaak van sukses lekker soet.

Hoekom het julle besluit om uiteindelik jul drome te verwesenlik? Pulane:

’n Mens kry min geleentheid om jou drome waar te laat word met die hulp van ’n ondersteuningstelsel, en Nou Of Nooit het my dié wonderlike geleentheid gebied om fiks te word met die nodige ondersteuning.

Ek wou altyd leer dans, maar het voorheen nooit kans gekry om dit te doen nie, want daar was altyd hindernisse en prioriteite. My twee dogtertjies, Kiana (9) en Brioné (6), is nou groter en meer selfstandig en ek het nie ’n werk met vaste kantoorure nie. Ek het dus nie meer verskonings gehad om die verwesenliking van die groot droom uit te stel nie.

Bertha: Wat was die grootste uitdaging tydens die verfilming van die reeks? Pulane:

Ek moes by ’n nuwe roetine aanpas. Ons het Maandae en Vrydae aan die reeks geskiet. Ek moes ses dae per week ’n uur lank onder die toesig van ’n persoonlike instrukteur, Mike da Silva, en twee Bodytec-afrigters (hulle help met behulp van hoë-intensiteitspieroefening om jou lyf fermer te maak), Juan en Estelle Coetzee, in die gimnasium The Fitness Fort in Linden, Johannesburg, oefen. Ek het ook ’n baie streng eetplan onder die wakende oog van ’n voedingkundige, Karin Paquay, gevolg. Dié voorgeskrewe dieet behels geen suiker, geen koolhidrate en geen vet. Ek dink dit was die moeilikste deel vir my.

Ek moes my huislike lewe herorganiseer en reël dat iemand my kinders by die skool aflaai of gaan

Bertha: