Die finale dood
Joseph Mascolo se afsterwe beteken Days Of Our Lives se Stefano DiMera gaan vir die laaste keer begrawe word.
Weekdae SABC3 (*193) 00:00
Toe die akteur Joseph Mascolo op Woensdag 7 Desember 2016 in die ouderdom van 87 ná ’n stryd teen Alzheimersiekte oorlede is, het die einde van ’n era aangebreek. As Days Of Our Lives (1965-nou) se sjarmante maar kil Stefano DiMera het Joseph een van die laaste werklike groot sepieskurke gespeel. The Young And The Restless (1973-nou, sien bl. 23) se boef Victor Newman (Eric Braeden) het dalk sy vyand Jack Abbot (Peter Bergman) verlede jaar met ’n dubbelganger vervang, maar het hy ooit ’n breinspoelfasiliteit so nodig gehad dat hy een in die kelder van sy herehuis laat bou het? Stefano was so ’n besonderse karakter dat Days hom van 1982 tot 2016 ’n ongelooflike 13 keer uit die graf teruggebring het.
DIE GROOT FAMILIEMAN
Iemand anders sou Stefano dalk ongeloofwaardig laat lyk het, maar Joseph het al sy sofistikasie en sjarme na die skerm gebring. Hy het altyd daarop aangedring – tot op die punt dat hy met die skrywers gestry en die sepie selfs meer as een keer verlaat het – “Stefano is baie, baie familie- georiënteerd. Dit is sy doel om sy familie veilig en vooruitstrewend te hou. Wanneer die skrywers sy familie teen hom laat draai, soms op maniere wat ek gedink het nooit regtig sou gebeur nie, sou ek dit keer,” het Joseph gesê.
Dit het aan Stefano se skurkstreke geloofwaardigheid en warmte verleen, aan die haai ’n hart gegee en verseker dat selfs mense wat nooit ’n sekonde na Days gekyk het nie, die naam Stefano DiMera geken het. Toe die 2001komediefliek Legally Blonde se Elle Woods (Reese Witherspoon) dus in haar aansoek vir haar regstudie wou wys hoe goed sy detail en feite kan onthou, het sy afgerammel: “Weer eens sluit ons aan by Hope in haar soeke na haar identiteit. Soos julle weet, sy’s deur die bose Stefano gebreinspoel . . . ”
GEKULTIVEERD EN BEMINLIK
Stefano was ’n skaakspeler, operaliefhebber en altyd uitgevat in ’n snyerspak. Daardie deel was geen toneelspel nie. Joseph het sy loopbaan as ’n konsertmusikant begin, en het twee jaar lank die klarinet in die Metropolitan Opera in New York gespeel ná hy met ’n beurs studeer het om ’n dirigent te word – dis hoe hy betaal het vir sy toneelspeellesse by die legendariese Stella Adler! As ’n musikant het hy selfs in Suid-Afrika getoer as deel van ’n kulturele uitruilaksie in die middel-1970’s, voor die destydse hoofskrywer van Days, Pat Falken Smith, in 1981 spesiaal die rol van Stefano vir hom geskep het. Joseph het in Januarie 1982 by die sepie aangesluit en sou kykers daarna as Stefano vir 1 623 episodes van Days vermaak.
GROET MET ’N SEER HART
Dit gaan moeilik wees om te aanvaar ons gaan The Phoenix hierdie keer nie weer sien herrys nie. Ná al daardie sterftes op skerm sou ons verwag Stefano het nog ’n laaste troefkaart. Soos Joseph gesê het: “Iemand het vir my gesê as ’n trein Stefano tref, sou ons verwag hy gaan weer opstaan ná dit oor hom gery het.” Joseph word oorleef deur sy tweede vrou (sedert 2005), Patricia Schultz-Mascolo, ’n baas by NBC TV; sy seun, Peter (by sy eerste vrou, Rose, wat in 1986 oorlede is); sy stiefdogter, Laura; sy suster, Marie; vyf kleinkinders en drie agterkleinkinders – kollegas en miljoene hartseer fans wêreldwyd. Days se uitvoerende vervaardiger, Ken Corday, sê: “Sy teenwoordigheid, groter as die lewe self, sy sagte hart en positiwiteit het ons almal dekades lank beïnvloed en sal in ons herinnerings voortleef.” Rus in vrede, Joseph.