Toneelspeel of aanbied?
Aanbieders by kykNET krap kop oor die kanaal se nuwe kontrakte.
Ek hoor Kim Cloete bied nie meer die nuwe seisoen van VeranderDinge, wat op Sondag 8 Januarie op kykNET begin, aan nie. Is dit omdat sy in Binnelanders speel? – AUBREY VAN SCHALKWYK, ROODEPOORT Eloïse Cupido, mede-aanbieder van kykNET se program Ontbytsake (2004nou), neem die leisels by Kim Cloete oor as die nuwe mede-aanbieder (saam met Ruda Landman) van seisoen 3 van VeranderDinge. Kim sê: “Ek is ’n paar maande gelede deur kykNET ingelig ek mag nie meer aanbiedingswerk vir die kanaal doen as ek ’n vaste kontrak as akteur by ’n kykNET-produksie het nie.” Kim vertolk sedert 2016 die rol van Bronwyn in Binnelanders (2005-nou). Sy sê die vervaardigers van Binnelanders, Stark Films, was tot dusver baie tegemoetkomend dat sy kan toneelspeel en ook ’n aanbieder wees. Kim het juis verlede jaar seisoen 2 van VeranderDinge klaar verfilm terwyl sy in Binnelanders gespeel het.
Volgens Karen Meiring, direkteur van Afrikaanse kanale by M-Net, is daar verskillende kontrakte vir sepie-akteurs en alles hang af van die akteur se spesifieke kontrak. “Indien akteurs ’n groot en deurlopende rol in ’n sepie vertolk, kan die spesifieke kontrak bepaal dat die persoon nie ook aanbiedingswerk mag doen nie,” sê Karen. “Die akteur is welkom om betyds met die vervaardigers te onderhandel sodat hulle vir die tydperk wat hulle aanbiedingswerk doen, uit die sepie geskryf word.”