The Art Of More
Seisoen 2 M-Net Edge (*102) 19:00 Drama
Ons is terug by oneerlike onderhandelings in die hoëdruk-, grootgeldwêreld van veilingsplekke wanneer The Art Of More (2015-nou) terugkeer. “Veilings gaan oor ongebreidelde begeertes en mense wat desperaat is om iets te besit. Dis interessant om te sien wat hulle sal doen om dit te kry,” sê die skepper en uitvoerende vervaardiger, Chuck Rose. En soos die kunsvoorwerpe op die skerm het die reeks ook sy stories.
1 The Art Of More speel in New York af, maar is in Montreal, Kanada verfilm (ook die tonele wat in Parys afspeel). Die Parke-Mason-veilingsgebou se buitekant is die Montrealmuseum van die Skone Kunste. 2 Christian Cooke het ’n dag by ’n Londense veilingsmaatskappy deurgebring om vir sy rol as Graham Connor voor te berei, en hy’t die gek storie gehoor: “’n Chinese magnaat het die vier grootste veilingsmaatskappye gebel en gevra hulle moet elk ’n verteenwoordiger stuur, want hy gaan al sy kuns verkoop. Toe hulle by sy huis in China opdaag, het hy gesê: ‘Môre gaan julle die speletjie klip, papier, skêr speel en die wenner kry die rekening.’” 3 Cary Elwes, wat Arthur Davenport speel, is vertroud met kunsstelle – sy pa en oupa was skilders en sy ma, ’n binneontwerper, het hom na veilings geneem. 4 Die beeldhouer Jean Pronovost, wat in Quebec gebaseer is, het die reeks se antieke Soemeriese artefakte gemaak, soos die masker wat met koper beslaan is in seisoen 1. 5 Al is die meeste kunswerke in die reeks replikas, is die kunstenaar James Juron se weergawe van Man On A Rope oorspronklik en in episode 2 te sien. [Honore Daumier het die oorspronklike skildery in 1858 geskep].