Liefdevolle gesin
Iva en Schalk sit die bal aan die rol om TJ aan te neem.
Daar is opgewondenheid in die lug, want die Strydersrugbyspan se afrigter, Schalk Brand (Johan Scholtz), en sy vrou, die span se sielkundige Iva (Nadia Beukes), het besluit om TJ (Johnny Potsanyane) aan te neem. Volgens Nadia het Iva en Schalk die geleentheid raakgesien “om vir TJ ’n standvastige huis vol liefde te bied”. Die Brands begin op Woensdag 22 Februarie met die aannemingsproses wanneer hulle hul eerste afspraak met ’n maatskaplike werker het.
DEUR DIEP WATERS
TJ is ’n kind wat die afgelope tyd deur diep waters is. In Desember verlede jaar is sy ma in ’n taxi- ongeluk dood, en hy het vir ’n ruk by sy oom Ike (Fezile Mpela), die Stryders se hulpafrigter, gebly totdat Iva en Schalk hul hart en huis vir hom oopgemaak het. Begin Februarie het TJ aan slapeloosheid gely, want hy het gedink as hy sy oë toemaak, sou hy nie wakker word nie en soos sy ma doodgaan.
Iva en Schalk het hom gelukkig gehelp om daardie vrees te bowe te kom, wat hul band met die dapper seun net sterker gemaak het. En nou is hulle op pad om amptelik ’n gesin te word.
Maar Ike is op Woensdag 15 Februarie in ’n tweestryd gewikkel oor die groot stap. “Hy is bekommerd oor die kultuurverskille tussen TJ en Iva-hulle,” verduidelik Nadia. Dis iets wat Ike met baie respek teenoor alle partye aanroer wanneer hy sy bekommernisse met Iva en Schalk bespreek.
SENUTERGENDE PROSES
Ná hul ernstige gesprek besef Iva en Schalk hulle het ’n groot verantwoordelikheid om TJ steeds aan sy agtergrond en Zoeloekultuur bloot te stel. Dis iets wat hulle breedvoerig met die maatskaplike werker bespreek wanneer sy hulle op Woensdag 22 Februarie tuis kom besoek.
Die afspraak verloop goed, maar die hele proses is senutergend, veral vir Iva, wat sukkel om haar emosies in toom te hou. “Iva het reeds ’n kind verloor [in April verlede jaar weens ’n miskraam en die nalatigheid van medici], en sy probeer haar bes om nie te emosioneel te raak oor die aannemingsproses nie. Maar dis nie vir haar maklik om haar vrese opsy te skuif nie. “Sy is baie gespanne hulle sal nie as ouers goedgekeur word nie, en dan sal sy TJ ook verloor,” sê Nadia.
KENNIS IS KONING
Iva begin op Donderdag 23 Februarie bekommerd raak sy weet nie genoeg van die Zoeloekultuur nie. Maar soos ons haar ken, sal sy vinnig haar neus in ’n boek druk of selfs ’n kenner op die gebied opspoor en die persoon dan peper met vra.
Dit gaan wel nog ’n ruk duur voor Iva en Schalk kan aankondig TJ is amptelik hul kind. En as ons na die storielyn kyk, gaan daar eers ’n struikelblok of twee uit die weg geruim moet word voor alles reg uitwerk.