Baas op ’n missie
DCI Banks fokus op een skurk in die finale seisoen.
DCI Banks Seisoen 5 Vrydae BBC First (*119) 21:00 (begin 24 Februarie)
Dis tyd vir aksie wanneer die speurhoof Alan Banks (Stephen Tompkinson) vir die finale seisoen van die Britse polisiereeks DCI Banks (2010-2016) terugkeer. “Dis donker en intens,” vertel Stephen, wat in 2010 die rol gekry het van die skrywer Peter Robinson se karakter in sy DCI Banksboeke (1987-nou). “Banks is sonder fieterjasies. Hy is doodgewoon, maar dis juis wat hom uitsonderlik maak,” voeg die 51-jarige Stephen by. Wat kan fans van die seisoen van ses episodes verwag?
UITGEREKTE DRAMA
Wanneer sake in vorige seisoene opgelos is, is nooit weer daarna verwys nie. In seisoen 5 werk Banks en sy Yorkshire-polisiemanne aan drie individuele sake (elk oor 2 episodes) sowel as ’n groter geheim wat oor al 6 episodes strek. “Banks probeer al lank om die skelm Steve Richards (Shaun Dooley) agter tralies te kry ná ’n jurie hom onskuldig bevind het aan ’n dubbele moord,” sê Stephen. “Banks wens hy kan sy instink volg. Hy weet Steve is skuldig en hoort in die tronk. Hy is dikwels reg maar wanneer hy nie is nie, is sy briljante span daar om hom op die regte spoor te hou.”
SAKE VIR DIE SLIMKOPPPE
Episodes 1 & 2 (3 Maart): ’n Dooie dwelmhandelaar word verbind met ’n geldvoorskieter wat Banks vermoed vir die “eerlike” eiendomsontwikkelaar Steve Richards werk.
Episodes 3 & 4 (10 & 17 Maart): ’n Chinese immigrant word vermoor en die polisie vermoed die moordenaar is ’n vriend.
Episodes 5 & 6 (24 & 31 Maart): Banks is buite homself wanneer sy kollega Annie (Andrea Lowe) vermoor word en die hoofverdagte ’n alibi het. Banks word aan die saak onttrek en begin met sy eie ondersoek na Steve, wat hy glo agter die moord sit.
FANS IS VIES
DCI Banks het meer as 6 miljoen kykersvir die eerste sowel as laaste episode gelok, maar ITV het die reeks gekanselleer. “Natuurlik was ons ongelukkig, maar sulke dinge gebeur,” sê Stephen. “Ons het getrou aan Peter se boeke probeer bly en ek sal Banks mis.”