As die SATC-vier vandag moes date
Sex & The City is terug op ons skerms, maar hoe sou die komedie met 2017 se dating-toneel vergelyk?
Sex & The City Seisoen 1 Woensdae (vanaf 22 Februarie) M-Net Edge (*102) 21:00-22:25
Wanneer dit gaan om die spyker op die kop te slaan met oorspronklike reekse het die skeppers van die 1990’s-komedie Sex & The City (1998-2004) dit reggekry. Die baanbrekerreeks gaan oor vier sterk en onafhanklike vroue wat vrede maak met hul loopbaan, sekslewe en al die modes wat vroeg in die 2000’s in New York City beskikbaar is. En al was daar ’n paar splinterreekse soos Lipstick Jungle (2008-2009), Girls (2012-nou) en Younger (2015-nou), het hulle almal tekort geskiet. Sex & The City (SATC) word ’n tweede keer uitgesaai op M-Net Edge (in vier episode lange binge- gleuwe), maar is dit vandag nog so relevant as wat dit destyds was? Jy moet dit glo, “al het die tye ver- ander”, lag die reeksster Sarah Jessica Parker, wat die koerantrubriekskrywer Carrie Bradshaw gespeel het. Om uit te vind net hoe verskillend 2017 is van 1998, toe die reeks bekendgestel is, is hier ’n voorstelling oor hoe die vroue se lewe vandag sou wees . . .
WERKENDE VROUE
1 Die kunshandelaar Charlotte (Kristin Davis) moet haar droom van ’n eie kunsgalery in die reeks laat vaar weens haar duur egskeiding. Spring na 2017 en haar kunstentoonstellings sou globale geleenthede wees danksy sosialemediaplatforms soos Deviant Art And Etsy, en die idee-uitruilplatform Pintrest.
2 Om ’n koerantrubriek te skryf is ’n droomwerk vir Carrie, tesame met die droomsalaris om vir haar deftige Manolo Blahnik-skoene (vanaf $900 – R12 500) te betaal. Maar in 2017 sou Carrie hardekopie-koerante vir nuuswebwerwe verruil het en haar rubriek in ’n winsgewende blog verander het, tesame met ’n Lookbook-rekening waar Carrie foto’s van haar uitrustings, skoene en bykomstighede plaas.
3 Om in die skakelwese te wees beteken om die hartklop te voel vir Samantha (Kim Cattrall). Maar waar dit in 1998 maklik was, is 2017 ’n heeltemal ander monster en sy sal ’n sosialemedia-beïnvloeder moet wees met rekenings op onder meer Twitter, Instagram, Snapchat en YouTube.
4 Wat die werkslaaf-prokureur Miranda (Cynthia Nixon) betref, het nie veel in die regsbedryf verander nie, maar om werk en verwysings in 2017 te kry sou makliker wees met professionele webwerwe soos LinkedIn en Google+.
BELANG VAN LIEFDE
Destyds was dit ’n missie vir die SATCvroue om die regte man te vind, en hulle het gehoop om romanse te vind in klubs, kroeë en partytjies. Vandag is dit makliker om ’n date te kry danksy aanlyn dating-webwerwe soos Match. com, Eharmony en OkCupid. Samantha, wat haar nie daaraan steur om iemand se detail na te speur nie, sou dalk die beperkingsvrye hook-up apps Tinder en Bumble verkies.
GEEN DRAMATIESE POUSE
Om te weet wat hul ekse se doen en late is, sou soveel makliker wees vir Carrie & kie as hulle die sosialenetwerkwebwerwe soos Facebook en Twitter gehad het. Die nuuskierige Carrie sou van die begin af van haar liedesbelangstelling Mr. Big (Chris Noth) se egskeiding en Aidan (John Corbett) wat pa geword het, kon uitvind. Ook, hoekom wag om by ’n landlyn te kom om jou vriendinne van groot nuus te vertel as Whatsapp, Skype en FaceTime alles op jou selfoon is? Selfs ’n aand uit sou makliker wees – ’n foonboek is onnodig wanneer jy jou apps kan gebruik om ’n Ubertaxi te ontbied en met Zomato ’n plek vind om te eet.