Grondprobleme
KK het ’n groot plan om mag by die Mukwevho’s te kry.
Muvhango Weekdae SABC2 (*192) 21:00
Die arrogante en konkelende sakeman KK (Macdonald Ndou) dink altyd aan maniere hoe om meer mag en geld te kry. En sy jongste plan behels iets baie belangriks van die Mukwevho’s, sy mededingende familie. KK weet die Mukwevho’s sal hom niks gee van wat hulle besit nie, daarom reël hy dat ’n ou familievriend die saak aanroer.
LAND VAN DIE ALMAGTIGE
Op Maandag 6 Maart bel KK die Mukwevho-familievriend [die sepie het geweier dat ons die identiteit bekendmaak] om oor sy plan te gesels. “KK weet daar is ’n pragtige stuk grond, Tshatshingo, in Venda. Daar is geen geboue nie, net wilde diere en ongerepte natuurskoon. KK beskou die plek as ’n geleentheid om geld te maak deur ’n vakansieoord daar te bou wat hy aan sy seun Mudi (Thabelo Makakavhule) kan nalaat,” sê Macdonald. Later onthul KK se vennoot iets kommerwekkends – die plek waaragter KK is, is die Mukwevho’s se gewyde Tshinawo.
HOOFMAN-WORSTELINGE
Macdonald sê “die Mukwevho’s gebruik Tshinawo om die voorvaders te vereer en familierituele te beoefen”, en hulle sal dit nie sommer prysgee nie. Op Donderdag 9 Maart hoor hoofman Azwindini (Gabriel Temudzani) deur die koninklike familie se sangoma, Mulimisi, (Humbulani Tsharani), iemand het navraag gedoen oor die heilige grond en besef dit moes KK wees, want hy het daaroor uitgevra met sy vorige besoek aan Thathe. Die hoofman is woedend en op Vrydag 10 Maart ontmoet KK en Azwindini, maar nie een van die hardkoppige mans is gewillig om te onderhandel nie.
GEHUIL VAN DIE VOOROUERS
Maar op Maandag 13 Maart het Mulimisi ’n profetiese droom en jaag om dit vir KK en Azwindini te vertel. Macdonald onthul: “Mulimisi se droom was oor die voorsate wat die Mukwevho’s en KK se familie skade aandoen as KK op die gewyde grond van Tshinawo bou. Azwindini is geskok deur Mulimisi se droom, maar KK dink dis net towerspreuke om hom te ontmoedig.”