Familiefoto
Seisoen 3 VIA (*147) 17:30 Leefstyl
Die vryskut-fotograaf Lisa Skinner is al jare tuis agter die kamera, maar nou sien ons haar voor die lens waar sy gesinne vir die nuwe VIA-reeks Familiefoto afneem. “Ek is ’n natuurlike ‘performer’ en gee glad nie om om nou en dan die hanswors te wees nie,” sê Lisa. Dan vergeet sy vir eers van die TV-kamera en konsentreer net op haar onderwerp. “Ek dink my fokus op die foto’s help die gesinslede ook meer ontspan,” sê sy.
Wat is jou grootste uitdaging by Familie
foto? Afrikaans is my tweede taal en ek praat dit nie suiwer nie. Daar’s al etlike kere vir my gesê ’n mens “neem” ’n foto, nie “vat” nie, maar ek sê dit steeds. Ek wou eenkeer sê: “Staan nou op”, maar toe sê ek per ongeluk “Gooi nou op” [lag]. Die foto wat ek ná daardie blaps geneem het, is kostelik, want jy kon duidelik die verwarring op die mense se gesigte sien!
Wat is die gulde reël wanneer jy ’n fam
iliefoto neem? Elke mens het sy eie skoonheid en karaktertrekke wat hom of haar besonders maak en wat ek deur my lens probeer vasvang. Daarom probeer ek mense op hul gemak laat voel, al beteken dit ek moet soms effens verspot wees.
Buiten mense, wie of wat neem jy graag af?
Ek begin ál meer kosfotografie doen. Ek het aan verskeie kosreekse soos The Great South African Bake Off [BBC Lifestyle 2015 & 2016] en Ilse Kook [kykNET, 2013] as fotograaf gewerk en het baie respek vir sjefs en die kosbedryf. Maar my eerste liefde sal altyd portretfotografie bly – van Toeareg-vroue in die woestyn buite Timboektoe in Wes-Afrika, glanspersoonlikhede soos die Britse aktrise Emma Thompson tot staatshoofde soos oud-president Nelson Mandela.