37 Realiteit: Kokkedoortjie
Kinderkokke wys hul slag in die kombuis.
Kokkedoortjie Seisoen 1 Woensdae kykNET (*144) 20:00 (vanaf 5 April)
Die grootmense het hul beurt gehad met die gewilde kykNET-reekse Kokkedoor (2013 en 2014) en Koekedoor (2015 en 2016), maar nou is dit die kinders tussen 9 en 13 jaar se beurt om agter die kospotte in te skuif en te wys waartoe hulle in staat is. En kyk gerus saam, want hierdie kuikens kan kook!
OORWELDIGENDE REAKSIE
Paul Venter, vervaardiger van Homebrew Films, vertel die belangstelling vir die nuwe realiteitsreeks was oorweldigend. “Ons het duisende inskrywings ontvang, selfs meer as vir Kokkedoor of Koekedoor.” Ná baie kopkrap is dit na 330 oudisies afgeskaal, en daarna is die oudisies verlede jaar in Johannesburg, Bloemfontein en Kaapstad gehou.
Die genooide kandidate moes kolwyntjies bak wat iets van hulself verklap. Tydens die tweede ronde is die kinders se vaardighede in die kombuis getoets en indien hulle na die derde ronde deurgedring het, moes hulle ’n TV-toets aflê om te sien of hulle gemaklik voor die kameras is.
“Dit was ’n enorme taak om uiteindelik net 10 deelnemers te kies,” sê Paul, en vertel die tiental kom vanoor die hele land – van Pretoria tot Worcester.
BEOORDELAARS EN DEKOR
Omdat Kokkedoortjie die “kuiken” van Kokkedoor en Koekedoor is, was dit logies om een beoordelaar van elke span, Nic van Wyk (Kokkedoor) en Mari-Louis Guy (Koekedoor) te kies, sê Paul. “Nic en Mari- Louis is albei koskenners, geliefd en het self kinders wat van bak en brou hou,” voeg hy by.
Kokkedoortjie is ’n eg inheemse produksie en allesbehalwe ’n nabootsing van Junior MasterChef, vertel Paul. “Dis alles in die naam – ons deelnemers is nie sjefs nie en ons verwag ook nie sjef-standaarde van hulle nie. Kokkedoortjie gaan oor ongelooflike kinders wat goed kan kook.”
Die reeks is in ’n ateljee in Milnerton, Kaapstad, verfilm, langs die ateljee waar die sepie Suidooster (2015-nou) geskiet word. Die dekor is bloot ’n verlengstuk van die Koekedoor-tema van Steam Punk na Alice In Wonderland en Charlie And The Chocolate Factory. “Die stel lyk soos ’n fantasiewêreld en skep ’n lekker werken speelplek vir die kinders,” sê Paul.
TEMAS EN VERNUF
’n Hele span het koppe bymekaargesit oor die temas en uitdagings, maar uiteindelik het Errieda du Toit (inhoudsvervaardiger) en Martjie Malan (finalis, Koekedoor, 2015) ma gestaan vir al die temas.
“Hulle moes sorg dat elke tema nie te maklik of te moeilik is nie en wel binne ’n bepaalde tyd deur die deelnemers voltooi kan word. Van die uitdagings/ temas sluit in die beste toebroodjie vir ’n kosblik, ’n superheldburger, middernagpannekoeke en ’n verjaardagkoek,” verklap Paul. “Nic en Mari-Louis het self ’n ding of twee by die jong kokke geleer!”
En nes met enige kompetisie waar daar ’n tydsbeperking is en pryse op die spel is, kan ons trane en vreugdegille van die jongklomp – en hul ouers wat hulle vergesel – verwag.