Realiteit: Dinner Date
Die pad na die hart loop deur die maag, meen die nuwe plaaslike maatsoekprogram Dinner Date.
Dinner Date Seisoen 1 Woensdae SABC3 (*193) 19:30 (vanaf 5 April)
Die nuwe realiteitsreeks Dinner Date (2017-nou) is ’n hutspot van ’n kosen maatsoekprogram, smaaklik saamgeroer. Die gashere/vroue berei ’n driegangete van hul keuse, en verwelkom dan hul dates in hul huis. Ná die proefkonyne drie aande agtereenvolgens by iemand anders gaan eet het, kies hulle ’n gunsteling uit die drie en gaan saam met die persoon op ’n ete-afspraak by ’n plaaslike restaurant. Die ongelukkige gashere/vroue kry ’n mikrogolfete vir een – darem in die gerief van hul eie huis . . .
PLAASLIKE GEUR
Die oorspronklike Dinner Date word sedert 2010 in Brittanje uitgesaai, en die vervaardiger Coco Sefanyetso sê “hoewel die konsep getrou aan die Britse formaat bly, sal die Suid-Afrikaanse kookkuns sowel as die verskillende rasse en kulture in ons land in die program weerspieël word”. Seisoen 1 is in Joburg verfilm en sal 13 episodes hê, wat die enkellopers op hul drie afsprake na die huise volg. Die vervaardigers het vooraf onderhoude met die deelnemers gevoer en hulle volgens persoonlikheid en voor- en afkeure by die kokke geplaas. Elke deelnemer moes ook uit vyf spyskaarte die drie kies waarvan hulle die meeste hou, en dit het help bepaal wie die beste by mekaar sal pas.
’N PAAR HAAKPLEKKE
Hoewel die plasing van deelnemers redelik maklik was, sê Coco die res van die proses was ’n bietjie meer ingewikkeld. “Ons het goeie reaksie met die inskrywings gekry, maar toe ons die mense nader, wou baie kop uittrek. Party van hulle is deur familielede ingeskryf en hulle wou regtig nie deelneem nie.”
Daar was ook ’n paar uitdagings met die verfilming. Coco verduidelik: “Soms het dit soos die skending van privaatheid gevoel. Ons het die persoonlike ruimte van die kokke binnegedring en dit was moeilik. Al wat ons wou hê, is hulle moes so natuurlik moontlik voor die kameras wees, want daar is geen draaiboek nie. Maar party van hulle was regtig skaam.”
WAAR IS ‘DIE EEN’?
Vlerksleepprogramme word ál gewilder in Suid-Afrika en dis deels hoekom Coco en haar span die uitdaging aanvaar het. “Mense se reaksie op sulke programme [soos Boer Soek ’n Vrou, 2008-nou] het my hoop gegee vir Dinner Date. Ek dink Suid-Afrikaners glo nie meer jy gaan noodwendig ‘die een’ op die tradisionele uitvra-manier ontmoet nie. Mense moet hulself meer blootstel om liefde te vind.”
En hoewel seisoen 1 pas begin het, erken Coco hulle beplan reeds ’n tweede seisoen wat hulle in Kaapstad wil verfilm as hulle die groen lig kry.