Drama: The Collection
The Collection se kostuumontwerpers Chattoune & Fab bring hoogmode na die kassie.
The Collection Seisoen 1 Sondae BBC First (*119) 21:00 (vanaf 2 April)
Die bekendstelling van die modeontwerper Christian Dior se rojale New Look in Februarie 1947 het groot woede in die Tweede Wêreld- naoorlogse Parys veroorsaak. In Oktober 1947 het die fotograaf Walter Carone die oomblik vasgevang toe arm, woedende vroue in Lepicstraat die oordadige nuwe Dior-rok van ’n jong vrou se liggaam afskeur uit protes teen die “verkwistende” gebruik van materiaal. Die regte-lewe- oomblik is die inspirasie agter ’n soortgelyke toneel in episode 2 van die mode-periodedrama The Collection (2016) op Sondag 9 April.
VOORTREFLIKE BEDERF
En al verhoog die reeks die drama met moord, geheime Nazi-samewerkings, besigheidsintriges en familieskoknuus, is dit ’n voortreflike bederf vir enigeen met selfs ’n terloopse belangstelling in naoorlogse modes, danksy die ongelooflike werk van die Franse kostuumontwerpers Chattoune & Fab.
’n Ontwerpspan van tien, insluitend regte Paryse kleremakers, het ses maande geneem om die ontwerpateljee House Of Sabine se skitterende herbekendstellingsversameling van 30 aandrokke te skep. En hulle moes nog 1 200 periode-uitrustings kry en maak vir die kernspelers en ekstras (waarvan baie by kostuumbiblioteke in Parys, Rome en Brittanje gehuur is). Al verwys die ontwerpe na die Paryse modes van die laat 1940’s, is niks van Dior se beroemde reeks nageboots nie; dit is alles van nuuts af gemaak. Chattoune & Fab se verwysings was minstens 2 000 foto’s wat in Parys se modebiblioteke gebêre is, en elemente van verskillende rokke van die tyd is vermeng sodat The Collection nie net ’n goedkoop naboots-Dior-storie word nie, maar eerder die essensie van die opwinding rondom die nuwe voorkoms vasvang. Dior-fans sal wel oomblikke sien wat deur sy outobiografie Dior By Dior (1956) geïnspireer is.
Dior – en The Collection se Paul Sabine (Richard Coyle) – het gerebelleer teen somber oorlogtydse rokke wat so reguit moontlik was weens materiaal- rantsoene. Die reeks toon uurglas-silhoeëtte en lang, vol rompe wat ’n spul materiaal en arbeid vereis het – dink aan 50 meter materiaal pleks van net twee! “Vroue is tydens die oorlog bevry met baadjies en broeke en skielik: ‘Oe! Die mode kom en dis ’n geval van kom ons gaan terug na korsette en wees ongemaklik,’” skerts Chattoune. “Dit was ’n tyd om te sê: ‘Die oorlog is verby, kom ons leef weer,’ maar die gebaar van optimisme was nie net sentimenteel nie.
BEWUSTE POGING
Daar was ’n bewuste poging om Parys se reputasie as die wêreld se modehoofstad terug te eis, om besigheid en geld terug te bring om Frankryk te help herstel. Gevolglik is die klere in The Collection so weelderig en elegant. Vir ’n trourok van The Collection is 70 meter materiaal gebruik, “wat dit baie swaar maak en dus pynlik was om te dra vir Jenna (Jenna Thiam, wat Nina speel, die kleremaakster wat model word),” verduidelik Chattoune. “Dis soos om 25 uitrustings op een slag te dra. Hoogmode is nie vir almal nie!”