Beter kykgenot
E.tv kikker sy programrooster en TV-aanbod op . . . en die kanaal is nie die enigste wat sy rooster verander nie!
“Ons het na ons kykers geluister en ons gee hulle wat hulle wil hê. Hou ons dop – groot dinge is aan die kom,” sê Marlon Davids, besturende direkteur (BD) van e.tv se kanaalafdeling, oor die foon. Die gratis uitsaaiplatform het “die afgelope jaar ’n beduidende hoeveelheid navorsing gedoen” ná hul opknapping in 2015 en hul BD sê: “Ons dink ons het die perfekte balans tussen wonderlike plaaslike inhoud en bekende internasionale aanbiedings.”
Vanaf April 2017 sal e.tv hul aanbod op OpenViewHD uitbrei met eExtra en True African, en hulle is ook “baie toeganklik” vir besprekings met ander platforms om hul kanale te dra (eKasi+ is vernuwe as eExtra en eNolly as True African). eExtra sal die episodes van plaaslike reekse soos Scandal! (2005nou) en Rhythm City (2007-nou) uitsaai die dag nadat dit op e.tv verskyn het, tesame met ander internasionale reekse. eMovies Extra is ook verlede jaar in Oktober bekendgestel en het bewys dit is ’n sukses op die kanaal – “Om twee fliekkanale in die OpenView HD-pakket te hê is ’n belangrike skuif,” verduidelik Marlon. “Op e.tv is daar Saterdagaande ’n kindervriendelike fliek soos The Smurfs. As jy nie lus is daarvoor nie, kan jy nou byvoorbeeld ’n komedie met ’n volwasse tema op eMovies+ kyk, en op eMovies Extra is daar aksie of drama. Drie kanale – drie flieks – alles gratis.” [Die OpenView HD-dekodeerder kos ’n eenmalige R399, met gratis maandelikse intekening.]
LOCAL IS LEKKER
Die kanaal hou die sosiale media fyn dop, en Marlon voeg by dis ’n blitsbarometer: “Ons kykers laat van hulle hoor en die interaksie het ons teruggebring na ons kernpilaar: Daar moet elke aand iets wees om te kyk.” En ’n groot deel daarvan is hul sepies, wat ook ’n nuwe voorkoms kry . . . soort van. Die mynreeks Gold Diggers (2015-nou) wat op Vrydag 7 April eindig, word op 10 April om 20:00 vervang deur Broken Vows (lees meer op bl. 24). Dit speel in ’n Joburgse trou-onderneming af en daar is puik akteurs soos Thembi Mtshali-Jones, Jo-Anne Reyneke, Thapelo Mokoena en baie ander wat vir drama- en sepieaksie sorg.
OORSESE TREFFERS
Maar daar moet balans wees, en e.tv het hard daaraan gewerk. “Internasionaal is so belangrik soos plaaslik,” sê Marlon. Die aksiedrama Ray Donovan (2013-nou) is in 2016 bygevoeg, asook die dramedie Devious Maids (20132016). Vanjaar is die drama How To Get Away With Murder (2014-nou) bygevoeg. “Ons kry in April ook The Fixer [sien die volgende uitgawe van tvplus, te koop vanaf 7 April],” sê Marlon. “Daar is meer as 7,9 miljoen huishoudings wat nie DStv het nie en ons kan hulle bedien. Die potensiaal vir kykers om hierdie reekse te sien is enorm!”