Is dit tjoekie toe?
Tommie word vir dronkbestuur gearresteer.
Getroud Met Rugby Weekdae kykNET (*144) 18:30
Tommie Bekker (Arno Greeff) het vroeg vanjaar uiteindelik besef wat sy roeping is – entrepreneurskap – en in alle erns begin studeer. Sodoende kon hy gaandeweg ontslae raak van sy gewraakte swartskaapstatus in die Bekker- gesin. Maar op Dinsdag 4 April word hy vir dronkbestuur gearresteer, en daai swart skaap doem weer op . . .
NET DRIE BIERE . . .
Dis ’n gesellige Dinsdagaand [4 April] by die plaaslike kuierplek Potties, en Tommie en sy vriendin, die pompondanseres Silvia (Nastassja Pretorius), kuier saam met ’n bier in die hand. Een bier word twee, twee word drie en dan is dit tyd om huis toe te gaan.
“Silvia raai aan hulle moet ’n taxi huis toe neem, maar Tommie sê hy is nie dronk nie en kan sy eie motor bestuur,” vertel Nastassja. Soos te wagte word hulle van die pad afgetrek, en Tommie word gearresteer en aangehou op aanklag van dronkbestuur.
Arno sê Tommie is bang en kwaad, want hy voel hy het nie te veel gedrink nie. “Maar nou is hy vir die eerste keer regtig in die moeilikheid – en dis nie ’n grap nie.”
TOT DIE REDDING
Die volgende dag, op Woensdag 5 April, kom die Strydersrugbyspeler Blitz ( Werner Coetser), Tommie se suster Lorette (Ilse-Lee van Niekerk) se vriend, tot sy redding en betaal sy borgtog.
Tommie is vreesbevange sy ouers gaan van die affêre uitvind, en hy smeek Blitz om hom te help om uit die moeilikheid te kom. “Blitz gee vir hom ’n kontaknommer van ’n prokureur wat kan help, en moedig Tommie aan om oop kaarte met sy ouers te speel,” sê Arno.
OP DIE ROTSE?
Tommie het teen Donderdag 6 April steeds nie die moed bymekaargeskraap om sy ouers, Gideon (David Vlok) en Nina (Jocelyn Broderick), van sy inhegtenisneming te vertel nie. En dit veroorsaak probleme in sy verhouding met Silvia.
“Silvia glo nie in geheime nie en kan nie verstaan hoekom hy vir sy ouers bly jok nie,” sê Nastassja. “Een van haar waardes is om altyd die regte ding te doen – en dit lyk vir haar of Tommie aspris nie wil nie. As hy so aangaan, kan dit die einde van hul verhouding beteken.”
Op Maandag 11 April vind ’n senuagtige Tommie – en ons – uit wat die onmiddellike toekoms inhou wanneer hy in die hof verskyn.