Resep vir ’n ramp
Lehasa flous Sonti om haar familie se geheime neutresep vir hom te gee.
Skeem Saam Weekdae SABC1 (*191) 18:30
Die sakevrou Sonti (Pearl Maimela) is halsoorkop verlief op haar manipulerende vennoot Lehasa (Cedric Fourie), en hy het haar om sy pinkie gedraai – sy sal enigiets doen om hom gelukkig te maak. Op Woensdag 29 Maart hoef hy nie veel te doen om haar om te praat om die regte van haar gegeurde neutverspreidingsbesigheid aan hom oor te teken nie. Lehasa sê vir Sonti sy teken ’n kontrak om haar maatskappy te laat groei. Maar omdat sy nie mooi dink nie besef Sonti nie regtig wat sy doen op Maandag 3 April nie. Opgewonde oor die naderende uitbreiding van Sonti M, kry Sonti ’n kookskoolstudent, Katlego (Patrick Seleka), om nuwe geure te ontwikkel om die bestaande reeks te komplementeer, Dit is ’n Magongwa-familieresep wat al jare ’n goed bewaarde geheim is. Maar Lehasa besef Kat kan sy plan verongeluk en sê Sonti moet Kat los. “Dan begin die probleem, want as daar een ding is wat Kat nie kan verduur nie, is dit verraad,” verduidelik Pearl.
Die ink van Sonti se handtekening is nog nie droog op Lehasa se twyfelagtige kontrak nie, of Kat vertel Sonti se inmengerige suster Mapitsi (Mogau Mothlatswi) daarvan op Maandag 3 April. “Mapitsi is woedend!” sê Pearl, veral wanneer dit bekend word die geheime en baie gewilde Magongwaresep is nou verkoop. “Mapitsi kan nie glo Sonti het hul geheim verkoop nie.” Mapitsi vertel hul pa, Meshack Magongwa (John Morapama), en stiefma, Gloria (Boitumelo Mothabela), maar om familiedrama vir Sonti te skep is deel van Kat se wraakplan – hy dagvaar haar op Dinsdag 4 April. “Sy het hom ’n deel van die wins belowe wanneer Sonti M groei, maar omdat Lehasa nou die meerderheid besit, het sy nie langer beheer nie,” sê Pearl.
DIE NEUTKRAKER
Sonti vertel haar familie die waarheid op Donderdag 6 April en hulle probeer haar uit die ooreenkoms met Lehasa praat, maar dis te laat. “Hulle is ontsteld en bekommerd oor haar,” verduidelik Pearl. “Hulle wil hê wat die beste vir Sonti is en hulle weet Lehasa is nie goed vir haar nie.” Sonti het haar goeie kêrel Babeile (Matthews Manamela) vroeg in Februarie gelos om by Lehasa te wees. Op Maandag 10 April vaar Lehasa sonder rede teen haar uit en Sonti besef hy is nie mal oor haar nie. Die volgende dag, op Dinsdag 11 April, is Sonti in ’n benarde posisie nadat “Lehasa haar verneder. Haar lewe is aan stukke omdat sy haar ondersteunende familie en ou in die steek gelaat het. ’n Mens weet nie wat met haar gaan gebeur nie,” verklap Pearl.