Weg! Agterpaaie
Seisoen 2 VIA (*147) 20:00 Leefstyl
Die Weg!-joernaliste Erns Grundling en Toast Coetzer versamel met elke nuwe reis nuwe herinnerings, stories en vars inligting – hulle reis die seisoen van Weg! Agterpaaie deur die Karoo en was met die vorige een in Namibië. Hulle leer ook nuwe moets en moenies vir ’n gerieflike langpadreis. Erns vertel van ’n paar nuwe uitdagings en wedervaringe op hul jongste reis deur die Karoo.
Het julle ander toerusting en artikels vir die Karoo saamgeneem as vir Namibië?
Ek het weer my kitaar ingepak, en Toast het sy bergfiets en kriekettoerusting ingepak wat nie Namibië toe was nie. Ons het albei aan ’n krieketwedstryd op Springfontein (episode 7) deelgeneem. Ons het in die Karoo meestal op gasteplase en in ’n paar dorpshotelle gebly, maar vir die slotepisode het ons ook kampeertoerusting ingepak.
Wat sal jy volgende keer inpak wat jy nie dié keer Karoo toe saamgeneem het nie?
Groter klere, want die hoeveelheid skaapvleis en skuinskoek wat jy eet, laat jou beslis ’n paar ekstra kilogram optel. In die Karoo sê jy nie nee vir ‘seconds’ nie. Dis baie, baie slegte maniere.
Julle is al twee dekades lank vriende, en werk en reis al sewe jaar saam. Het julle ooit verskille op die langpad?
Ek en Toast sit baie selde vas. Hy’s ’n beter bestuurder as ek en raak soms nukkerig as ek te vinnig ry of onseker is oor ’n driepuntdraai. Hy is meestal reg, daarom verduur ek dit maar, en ons grap gou-gou weer oor iets langs die pad.
Wanneer het jy die meeste vir hom gelag?
In episode 10, toe Toast in die dam buite Vanwyksvlei wou gaan swem. Dit was amper leeg, behalwe vir ’n paar kolle modderwater. Hy was van kop tot tone vol klei, soos ’n soort Loch Ness-monster van die Karoo!