Prime Suspect 1973
Seisoen 1 ITV Choice (*123) 20:00 Aksie
Prime Suspect (1991-2006) het ’n hoë standaard vir Britse misdaaddramas gestel, danksy Helen Mirren as Jane Tennison – een van die eerste vrouespeurders en hoofinspekteurs in die Groter Londen se polisiediens. ’n Dekade later gaan ons die vroeër jare in Jane se loopbaan beleef in die voorloperreeks Prime Suspect 1973 (2017-nou), met Stefanie Martini wat die rol in die eerste seisoen van ses episodes vertolk.
“Dit het waarskynlik gehelp dat ek niks van die oorspronklike reeks geweet het toe ek die rol gekry het nie,” skerts Stefanie. Die 26-jarige voeg by: “Ek het nie besef hoe belangrik ’n vrou in so ’n gesagsposisie in die gemeenskap was nie. Uiteraard was dit waardevol om te gaan kyk hoe Helen haar vertolk het en om te sien wie Jane later in haar loopbaan was, maar dit was my taak om uit te vind hoe sy daar gekom het. Sy is briljant en vasberade en het haar eie manier van dink oor dinge.”
Aanhangers van die ouer Jane kan dalk ietwat ongemaklik voel oor haar jonger weergawe, want sy’s nie so vol selfvertroue as wat ons haar leer ken het nie, maar Stefanie voeg by: “Prime Suspect 1973 kan op geen manier ’n baanbrekerreeks soos die oorspronklike een wees nie. Vandag is Jane een van vele vrouespeurders op TV, en baie programme raak die brandpunte aan soos in Prime Suspect gedoen is.”
Wat kan kykers dus verwag? Jane woon nog by haar ouers, probeer by die grootmenslewe aanpas, en kry te doen met wetsoortreders in die samelewing en depressie in die werkplek. Op 22 word sy aan die diep kant ingegooi met haar eerste moordsaak, en Stefanie sê: “Mense sal sien hoe Jane ontwikkel en die ‘ou’ Jane word.”