Knorrige professor
Frank Opperman gaan die volk weer laat skaterlag.
Nes met sy vorige rolle glip Frank Opperman gemaklik onder die vel van die eksentrieke brompotprofessor Knipoog Knoetze in die aweregse kykNET-komediereeks Phil 101 (2017-nou). “Een rol is nie vir my groter of belangriker as ’n ander nie. Elke nuwe rol wat ek aanpak bly ’n uitdaging,” sê Frank. Komedie is sy kos, maar hy probeer nie noodwendig ’n komiese karakter snaaks speel nie. “Ek het Knipoog juis baie ernstig probeer speel,” verklap die 56-jarige akteur.
KNIPOOG 101
Hy draai nie doekies om oor sy karakter nie. “Hy is ’n regte vark,” lag Frank. “Knipoog is een van daai professore wat dink hy’s vrek slim – en oulik. Hy is boonop ’n eenkantmens en baie plofbaar. Hy is so ’n tipiese professor, maar eintlik wou hy ’n beesboer wees.”
Vir die rol het Frank ’n grys baard en lang hare, maar hy het dit nie spesiaal laat groei nie. “Dit was reeds lank vir my rol as die kolonel in Ryk Hattingh se verhoogdrama Sing Jy Van Bomme, wat ons in Maart by die Woordfees op Stellenbosch opgevoer het.”
ALTYD OUBOET
Frank het ’n rits verhoogstukke en flieks agter sy naam en ons het hom al in uiteenlopende TV-rolle gesien, soos die Cipriotiese emigrant Chris Karedes (The Big Time, 1991 en 1993), die bose superintendent Yster Swart (Die Vierde Kabinet, 1998), en die begrafnisondernemer Tony in die kykNET-reekse Vlug Na Egipte en Terug Na Egipte (2014, tans weer Sondagaande om 20:00 op kykNET & kie). Maar vir die meeste mense sal hy altyd die bekendste wees as Ouboet in die immergewilde sitkom Orkney Snork Nie (1982-1992).
Frank is nie die enigste gryskop in Phil 101 nie – Pierre van Pletzen speel die dosent Manie Kraaywinkel en dis die eerste keer dat Frank weer saamwerk met Pierre, wat Spike in Orkney was en deesdae nog gereeld te sien is as die gevleuelde-woordespreker Oubaas in 7de Laan (20002017).
GESIN EN KITAARKLANKE
Hoewel die werk van ’n vryskutakteur onvoorspelbaar en onstabiel kan wees, sal Frank nooit sy kinders – Frankie (28) en Ena (10) – afraai om in sy voet-spore te volg nie. “Frankie is wel ’n vervaardiger en nie ’n akteur nie. Maar as dit in jou bloed is, is dit in jou bloed . . .”
Sy gesin speel ’n groot rol in Frank se lewe. Frankie, sy seun by die aktrise Susan Coetzer (Ralie in Meester, 1992), is onlangs met die aktrise en kabaretkunstenaar Debré Rossouw getroud en die paartjie woon reg langs Frank en sy lewensmaat, Esmarie, in Melville, Johannesburg. Frank is ’n betrokke pa en besorg Ena daagliks by haar laerskool in Aucklandpark sodat Esmarie betyds op haar pos kan wees in haar klerewinkel in Melville.
Tussendeur ruim hy tyd in vir ’n ander passie: musiek. “Ek het ’n musiekateljee onder in my huis ingerig en tokkel gereeld op die kitaar,” vertel Frank. Hy het twee albums op sy kerfstok, Serial Boyfriend (1999) en Let’s Be Frank (2009).
En ja, natuurlik herken mense hom nog ná al die jare as Ouboet. “Wat praat jy? Orkney word mos weer en weer uitgesaai, dus noem selfs die jong laaities my deesdae Ouboet.”
Sonder huiwering sê hy sommer Ouboet se rympie vir Yolanda (Sally Campher) op: “Poeksie Woeksie se Woepsie Wapsie Worsie is nog baie lief vir hom!” en voeg laggend by: “Jy sal nie glo hoeveel geld ek al met daai rympie verdien het nie, want mense betaal my om dit op te sê.”
Is dit ’n grappie? Dalk sal professor Knipoog die waarheid weet. • Lees meer op bl. 4 oor een van Frank se nuwe TV-projekte.