Jong kokke se lesse
Jong deelnemers se verbeelding en vernuf oorbluf Mari-Louis.
Mari-Louis Guy, mede-beoordelaar van die nuwe realiteitsreeks Kokkedoortjie (2017-nou), vertel die tien deelnemers (van nege tot dertien jaar) het die beoordelaars met hul kreatiwiteit en verbeelding in die kombuis verras. “Ons het self ’n paar lesse by die jong kokke geleer,” bieg sy.
Is jy en jou mede-beoordelaar, Nic van Wyk, net so streng met die junior deelnemers as met die volwassenes?
Ons het van die begin af besluit ons sou die deelnemers as huiskokke beoordeel en nie as kinders nie. Dit het ons minder emosioneel gemaak.
Daar’s sewe seuns en drie meisies in die kompetisie. Wys die outjies hul slag dan net so goed soos die meisies?
Ek was nie betrokke by die keuringsproses nie en was verras toe ek hoor die meisies is in die minderheid: jong meisies hou mos gewoonlik meer van bak en kook as seuns. Maar die ouens het ons verwagtinge met hul kennis en vernuf oortref. Hulle staan nie een tree terug vir die meisies nie.
Is hier ’n nuwe geslag man/seunsjefs in wording?
Sjefs en koscelebs is deesdae die nuwe “rock-sterre”. Mans oorheers steeds die professionele sjefwêreld wat getalle betref, maar dit is verblydend dat kinders deesdae vroeër in die kookkuns begin belangstel en reeds aan loopbane in daardie rigting dink. En dit beteken nie hulle hoef noodwendig sjefs in ’n kombuis of restaurant te word nie, want die kosbedryf bied deesdae soveel nuwe uitdagings en moontlikhede soos navorsing en tegnologie.
In hoe ’n mate is die volwassenes wat die jong deelnemers aan die kompetisie vergesel betrokke?
Wanneer die kinders ’n nuwe uitdaging kry, mag die volwassenes wat hulle vergesel ’n rukkie saam beplan en idees uitruil. Daarna word die jong kokke aan hul eie oorgelaat. Die volwassenes staan soms magteloos en toekyk hoe die kind die oond of die plate op ’n verkeerde hittegraad stel, of die termometer verkeerd gebruik. Soms stres die oupas, oumas, ma’s en pa’s baie meer agter die skerms as die kinders in die kombuis.
Kan ons in die volgende twaalf weke baie drama verwag?
My ma en broer het een episode op stel kom kuier en het tydens die uitskakeling trane afgevee! Wees gewaarsku – die reeks is die grootste tranetrekker.
Het jou interaksie met jou eie drie kinders – Max (11), Ethan (7) en Sophia (5)– in die kombuis jou op Kokkedoortjie help voorberei?
Beslis. Hulle het my geleer om kinders se wêreld en hul taal beter te verstaan. My kinders het my selfs oulike danspassies geleer wat ek in die kombuis doen.
En hoe vergelyk die Kokkedoortjie-deelnemers se standaard met hul oorsese eweknieë in reekse soos Junior MasterChef Australia (2010-2011)?
Daar is al baie geskryf oor Junior Masterchef Australia se deelnemers wat weke voor die tyd geweet het wat in die uitdagings sou wag en solank geregte en tegnieke onder die knie kon kry lank voor die kameras gerol het. Ons weergawe is meer onskuldig en ons poog om kinders se kosverbeelding vrye teuels te gee. Dit was vir my seker die beste aspek, om te sien waarheen hulle ’n uitdaging – soos om ’n ONverjaardagkoek te bak – neem. Die uitdagings en temas van Kokkedoortjie is ook meer kindervriendelik en nie bo hul vuurmaakplek nie – van die uitdagings sluit byvoorbeeld pannekoek en hamburgers in.
Het jy gevoel jy stap ’n fantasiewêreld binne op die Kokkedoortjie-stel?
O ja, en die produksiespan het my ook só aangetrek dat ek by die tema van die dag pas, en hulle het die komieklikste haarstyle vir my prakseer. Ek het soms soos ’n karikatuur gevoel!
Sal ouer kykers ook by Kokkedoortjie aanklank vind?
Sonder twyfel. Volwasse kykers gaan op ’n fantasievlug na ’n sprokieswêreld geneem word. En hopelik gaan Kokkedoortjie die grootmense weer inspireer om hul kinders na hul kombuis te nooi sodat almal lekker saam kan bak en brou.