Charlize se mense
Die sangeres Charlize Berg en haar gesin gee ons ’n blik op die musiek en wel en wee van hul lewe.
Met haar lang hare, perfekte grimering en effe aweregse gesin lyk dit amper asof die nuwe realiteitsreeks Die Bergs (2017), wat op 19 April op VIA begin, ons plaaslike weergawe van die internasionale Keeping Up With The Kardashians (2007-nou) kan wees. Maar dié reeks, wat wys wat alles tuis gebeur in die lewe van die sangeres Charlize Berg (24) – bekend vir treffers soos Braaf en As Jy Weet Dis Liefde (albei in 2016) – en haar gesin, is allesbehalwe ’n reeks oor ryk mense wat op partytjies uithang of heeltyd vakansie hou. “Ons is glad nie weelderig of stralerjakkers nie,” lag Charlize oor die vergelyking. “Ons is net ’n gewone Suid-Afrikaanse gesin met ons voete plat op die aarde. Daar is lag, drama, hope ondersteuning en liefde.”
ONTMOET DIE BERGS
Die reeks gee ons ’n binnekykie oor hoe die Bergs geraak word deur Charlize se besige lewe en loopbaan. Die gesin bestaan buiten Charlize uit ma Ilse (Charlize se bestuurder), pa Petrus (’n ontwikkelaar), Jakes (Charlize se tweelingbroer, ook ’n musikant en opkomende sanger), haar kleinboet Markus (’n student) en sy meisie, Rochelle, asook Charlize se verloofde, Warren Linden (24, ’n argitek).
Die kameras het in Februarie vanjaar begin rol. As sangeres is Charlize gewoond daaraan om voor gehore op te tree, onderhoude te voer en musiekvideo’s voor die kameras te skiet. Maar hoe het haar gesin dit ervaar? “Ek moet bieg, ek was stomgeslaan en trots op hoe hulle dit aanvaar en die kameras in hul persoonlike ruimte toelaat,” vertel Charlize. “Aan die begin was hulle ’n bietjie skaam, maar soos ons besig geraak het, het hulle die kameras nie eens meer raakgesien nie.”
Verfilming aan die reeks is nog aan die gang, maar tvplus kan reeds bevestig Charlize en haar broers verlaat hul ouerhuis en trek elk in hul eie blyplek in, in episode 1 (19 April).
REPETISIES EN ’N TROUE
Charlize het haar loopbaan in die musiekbedryf in 2011 begin en al ver gekom. Sy het drie albums uitgereik, Charlize Berg (2011), ’n Spesiale Aand Met Charlize Berg (2013), en As Jy Weet Dis Liefde (2016). In 2012 is sy vir ’n Sama (South African Music Awards) vir beste popalbum van die jaar benoem. Maar sy bieg daar’s nog baie dinge wat sy graag wil bereik, soos om ’n instrument te bemeester.
“My broer Jakes is ’n fenomeen wanneer dit by instrumente kom, en het sommer van kleins af die kitaar en klavier op gehoor begin speel. Ek wil vanjaar graag een van die twee instrumente begin speel,” sê sy. Daarom sal ons sien hoe Charlize in die reeks oefen om klavier en kitaar te speel. “In die stadium kan ek nog nie note lees nie, maar wil graag daardie vaardigheid aanleer. Hopelik is dit nie te moeilik nie.”
Tussendeur die musiek moet sy ook haar finale troureëlings afhandel. Charlize en Warren gaan op
Donderdag 13 April voor die kansel staan. “Ons deel graag ons spesiale dag met die kykers, en hulle kan daarna uitsien om ’n deel daarvan teen die einde van die reeks op skerm te sien,” sê Charlize.
Ons sal in Die Bergs ook sien hoe Charlize repeteer aan die pantomime Doringrosie (5 Mei- 4 Junie by Emperors Palace in Johannesburg), waarin sy die hoofrol vertolk, en waarin sy optree saam met sterre soos Marno van der Merwe (aanbieder van Varsity Sing, 2016-nou) en die sangeres Bianca le Grange (Idolsdeelnemer, 2002).