Vals deuntjie
Mangaliso se musiekloopbaan is geruïneer ná Bontle se onthulling.
Mangaliso (Bongani Masondo) stel sy trouplanne met sy ekstronkvoëlverloofde Lelo (Amanda du-Pont) op Woensdag 12 April uit wanneer sy naam deur die modder gesleep word deur sy vriendin Bontle (Keamo - getswe Leburu). Sy beskuldig die aspirantmusikant daarvan dat hy haar liedjie gesteel het, en dit betrap Mangaliso onkant. “Hy het vergeet hy het dit ’n tydjie tevore by Bontle gehoor en het werklik geglo dis sy liedjie,” sê Bongani. “Mangaliso het nie bedoel om dit te steel nie, regtig!”
Maar Bontle laat hom nie skotvry daarvan afkom nie. Sy vra Jazzy T (Karabo Mokhubela), haar kêrel wat ook Mangaliso se beste vriend is, op Donderdag 13 April om haar liedjie terug te kry. “Sy is bereid om alles in die stryd te werp. Jazzy T weet as die liedjie baie [oor die radio] gespeel word, kan dit Mangaliso baie ryk maak en hulle wil ’n deel van die geld hê, want dis Bontle se geld!” verduidelik Bongani.
MUSIKALE FOUT
Eers hou Mangaliso by sy storie, dat die snit syne is. Maar op Vrydag 14 April sê Jazzy T vir hom Bontle het die oorspronklike weergawe van die liedjie, en “Mangaliso is vreesbevange!” sê Bongani. “Dis Bontle se oorspronklike komposisie en Mangaliso is bang mense gaan hom ’n dief noem. Daar is niks wat hy kan doen om te keer dat sy na vore kom hiermee nie.”
Lelo probeer skadebeheer toepas en haar liefie se naam op Dinsdag 18 April in ere herstel, maar dis te laat. Die woord doen die ronde dat Mangaliso gesteelde musiek gebruik, en joernaliste bel Mangaliso aanhoudend. “Dit laat hom stres. Dis nie net sy loopbaan wat op die spel is nie, maar ook sy vriendskap met Jazzy T,” voeg Bongani by.
CHAOS VEROORSAAK
Dinge gaan van kwaad na erger vir die gekwelde musikant op Woensdag 19 April wanneer hy die omvang van sy oneerlikheid besef. “Almal in die bedryf begin Mangaliso se geloofwaardigheid bevraagteken,” sê Bongani. “So bevraagteken hulle ook die werk wat hy in die verlede gedoen het, werk wat regtig syne was.” Mangaliso is op Vrydag 21 April desperaat om die gemors reg te stel, veral met Lelo wat teleurgesteld is, want sy dink hy het hul lewe geruïneer. Hulle sou trou, maar hulle moet eers sy goeie naam in ere herstel. “Trouplanne is ’n gevoelige onderwerp,” sê Bongani.