Desperate oordosis
Alles word te veel vir Angie en sy gryp ’n bottel pille.
Kgothalo (Katlego Danke) is gedaan ná sy deur haar wederhelf, die sakeman Tyson (Shona Ferguson), aan haar eie lot in The Deep oorgelaat is, en sy neem sy fling, Angelique (Shannon Esra), kwalik. Sy is op ’n wraaktog en probeer die menseregteprokureur se reputasie vernietig deur Angie op Woensdag 12 April van die manipulering van bewyse te beskuldig terwyl sy die gevalle sakeman en moordenaar Lincoln (Lindani Nkosi) in die hof verdedig het. Maar selfs Kgothalo kon nie voorsien watter stappe haar teiken sal neem nie . . .
HEELTEMAL ALLEEN
“Angie loop die gevaar om van die rol geskrap te word,” verduidelik Shannon. “Angie voel sy het nêrens en niemand na wie toe sy kan gaan nie, want dis benede haar om haar familie of vriende om hulp te nader. Sy het ’n groot ego en weier dat mense haar as weerloos sien,” sê Shannon. Die enigste een wat Angie naby haar toelaat is Tyson, en op Donderdag 13 April probeer sy met hom in aanraking kom terwyl sy angstig op die hof se uitspraak oor haar optrede in die Lincoln-saak wag. “Die gewag maak haar gek, maar Tyson reageer nie,” voeg Shannon by. Met die swaard van skorsing wat oor haar kop hang, bereik Angie se emosies op Dinsdag 18 April ’n algehele laagtepunt, en Shannon sê: “Haar loopbaan is haar lewe. Sy het hard gewerk om te kom waar sy is, en sy weier om te glo dit kan alles binne sekondes verby wees.” Angie gryp na die bottel vir troos en een drankie word twee en dan drie . . . “Voor sy dit besef, is Angie dronk en dis ’n slegte ding – sy kry selfdoodgedagtes en vat ’n bottel pille om alles te beëindig,” onthul Shannon.
ALMAL PRAAT
Angie se moeilikheidmakerpa, Conrad (Deon Coetzee), tref haar bewusteloos aan op Woensdag 19 April, en Shannon verklap sy optrede “sal kykers verras. Angie word hospitaal toe gehaas, en die nuus oor haar selfdoodpoging laat The Deep gons.” Kgothalo besoek Angie op Donderdag 20 April, maar sy is allesbehalwe simpatiek: Sy maak dit duidelik sy sal Angie kelder om haar huwelik te red. “Angie is op ’n donker plek,” sê Shannon, “en kykers gaan ’n heeltemal ander kant van haar sien.”