Kontraktuele misverstand
Nonny het ’n ernstige beswaar voor sy met Pule kan trou.
Die ontvangsdame Nonny en die grootkop-belegger Pule (Phindile Gwala en Zwelethu Nkutsho) se troudag kom nader. Maar hul geluk word op Donderdag 13 April bedreig wanneer Pule vir sy verloofde ’n voorhuwelikse kontrak gee en wil hê sy moet dit teken. “Nonny is seergemaak,” sê Phindile. “Sy is onkant gevang en voel beledig.”
MYNE EN JOUNE
Volgens die kontrak word hul geldsake en besittings apart gehou, en sal dit sake makliker maak indien hulle uitmekaar sou gaan of sou skei. Dis die laaste ding wat Nonny wil hê – sy is lief vir Pule en hoewel sy geld beteken sy sal versorg wees, is dit nie die rede hoekom sy sy bruid wil wees nie. Vir Nonny voel dit as sy Pule se kontrak teken, is dit soos die voorbereiding op ’n egskeiding.
LEES TUSSEN DIE LYNE
Nonny reken ook op Vrydag 17 April Pule dink sy’s ’n fortuinsoeker. Sy is paranoïes en wend haar op Dinsdag 18 April tot haar baas en vriendin Than- daza (Sindi Dlathu). Thandaza het al die huwelik se hoogte- en laagtepunte beleef, sowel as egskeidings, en Nonny reken sy sal die beste raad hê. Nonny begin al klaar dink Pule beplan om haar te los, al hou hy vol hy volg net die huweliksprosedure.
“Thandaza probeer vir Nonny sê die kontrak is heeltemal in die haak en dis hoe dinge deesdae gedoen word en dit sal haar ook beskerm,” sê Phindile. Maar vir Nonny voel die “huweliksprosedure” na ’n manier waarop Pule homself en sy geld wil beskerm.
VERSKILLE EN AGTERDOG
Dit lyk of hul verlowing teen Woensdag 19 April aan ’n draadjie hang wanneer die kontrak hulle uitmekaardryf. “Nonny dink daar is geen vertroue nie. Dis omdat sy weet sy bring nie soveel [finansieel] in die huwelik in nie,” sê Phindile. Hoewel Pule sê daar is niks ongerymds aan die kontrak nie, bly Nonny agterdogtig en dink hy steek iets weg en jok vir haar.