In die vrygewige Vrystaat
In die tweede seisoen van Plaaskombuis kuier die aanbieder Elma Postma in die prentjiemooi Oos-Vrystaat.
“Die Oos-Vrystaters het hul huise en harte vir ons oopgemaak en hul bes bewaarde familieresepte met ons gedeel,” vertel Elma Postma oor die tweede seisoen van die VIA-leefstylreeks Plaaskombuis, waartydens sy in boere se kombuise kuier en sien hoe hulle kos maak. “Ons was aangenaam verras, want ons het meestal skaapvleisdisse verwag. Toe ontdek ons hulle spog met ’n klomp spesialiteite – soos stampmielie-paptert, beesfilet, afval en brandewyntert.”
POSITIEWE GEES
Plaaskombuis 2 is in Februarie vanjaar, kort ná goeie reën in die Oos-Vrystaat en omstreke, verfilm. “Die deel van die land was erg geraak deur die droogte, en ’n mens kon ná die reën die verligting en ’n nuwe positiewe gees oral aanvoel. Dit was asof die natuur saam met die boere gejuig het,” vertel Elma.
Die Oos-Vrystaat is bergagtig en prentjiemooi en het omtrent haar hart gesteel, voeg sy by.
Die filmspan se roete het van dorpie tot dorpie gekronkel – van Bethlehem, Uitzicht, Clarens, Zandfontein (buite Bethlehem), Clocolan, Fouriesburg, Ficksburg, Harrismith en Warden tot by Vrede.
Nes met die eerste seisoen is die meeste van die deelnemers op grond van hul uitsoekresepte, wat eers in die tydskrif Landbouweekblad gepubliseer is, gekeur.
“Om kos te verfilm is nie kinderspeletjies nie en dis ’n tydsame proses, maar die deelnemers was gelukkig baie geduldig en aanpasbaar,” vertel Elma.
In die nuwe seisoen word daar nie net op plase gekuier nie – die span maak ook ’n draai by gastehuise en selfs by ’n paar koffiewinkels om die room van die Oos-Vrystaat se tradisionele resepte aan kykers bekend te stel.
“Baie is goed bewaarde familiegeheime wat van grootjies na oumas en ma’s oorgedra is. Party van die resepte is wel hier en daar aangepas en gemoderniseer,” vertel Elma.
REGTE PLAASMEISIE
Die plaaslewe en platteland is geen nuutjie vir Elma nie – sy het self op die platteland grootgeword, en haar ouma en oupa het op ’n plaas tussen Wolmaransstad en Klerksdorp gewoon.
“My TV-aanbiedingswerk neem my telkemale terug na die platteland,” sê sy. Elma was die heel eerste aanbieder van die kykNET-realiteitsreeks Boer Soek ’n Vrou (seisoene 1-3, 2008-2010), daarna was sy mede-aanbieder van Ontbytsake op kykNET (2007-2008), wat dikwels op die platteland gefokus het, en verlede jaar was sy mede-aanbieder van die leefstylprogram Mooiloop! op SABC2 (2016).
Die seisoen sal kykers iets anders aan Elma opmerk – sy dra deesdae ’n trouring. Elma en die wiskunde-professor Paul Potgieter is in Desember 2016 getroud. “Ons het pas van ons wittebrood in Thailand teruggekom, toe moes ek my tasse vir Plaaskombuis pak,” vertel Elma, wat kykers as Dezi in 7de Laan (SABC2, 2000-nou) leer ken het (van 2000-2007). Sy was ook Bea Basson (van 2011-2014) in Binnelanders (kykNET, 2005-nou).
Vanaf Mei gaan ons Elma in die SABC3-sepie Isidingo (1998-nou) sien – sy gaan die rol vertolk van Lalage, ’n getroude vrou wat in haar omstandighede vasgevang word.
SMULPAAP
Terug by Plaaskombuis vertel Elma die lekkerste van die reeks is die proeëry. “Die vervaardigers het beslis nie ’n fout gemaak toe hulle my gekies het nie. Ek is glad nie vol fiemies nie en is mal oor lekker kos en interessante resepte.”