Oorlog verklaar
Inspekteur Gently het in seisoen 7 twee groot loopbaanuitdagings.
Inspector George Gently Seisoen 7 Vrydae BBC First (*119) 20:00 (vanaf 14 April)
Die Britse misdaadreeks Inspector George Gently (2007-nou) het in 1964 begin. Sewe seisoene later, in 1969, kry hoofinspekteur Gently (Martin Shaw) sy grootste uitdaging tot dusver: sy gesondheid wat agteruitgaan en kollegas wat in die pad staan van die nuwe saak wat hy ondersoek. “Die skrywers het gedink George het die seisoen nog ’n uitdaging nodig, daarom verken ons veelvuldige sklerose,” sê die hoofspeler, Martin. “Dis ’n siekte [van die senustelsel] wat kom en gaan, maar dis in die hele nuwe vierdelige reeks teenwoordig.”
VEG TERUG
Die vier episodes is 90 minute elk, en Martin voeg by: “Ek het baie navorsing gedoen om met die toestand toneel te speel – nie vir die drama nie, maar uit respek vir kykers en
mense wat daaraan ly. Mense gebruik deesdae dagga as ’n doeltreffende behandeling, maar in 1969 het George dit nie oorweeg nie!” Ook nie hulp van sy kollegas nie. Inspekteur Gently ondersoek die verkragting van ’n sekswerker, maar sy kollegas dink hy het “koekoes geraak”, want ’n prostituut kan nie verkrag word nie – sy verkoop dan seks. George hou nie van die onkorrekte ingesteldheid nie, en maak dit sy missie om die manier te verander waarop die polisiemag verkragtingsake hanteer.
ONDERSTEUNERS
George kan darem op sy twee getroue vriende in die mag reken soos die episodes ontvou. Sersant (Lisa McGrillis) herleef tragiese herinnerings in episode 2 (21 April) wanneer hulle ’n skynbare selfdood van ’n dokter ondersoek.
George se regterhand, speurinspekteur John Bacchus (Lee Ingleby), spring steeds rond in sy kaboutergroen pak. “Ek hou daarvan om aan die reeks te werk, maar kan John nie maar ’n oormaaksessie kry nie?”