Nuwe horisonne
Dorette Potgieter oortref haarself as die gefolterde Annalien.
Swartwater Seisoen 2 Dinsdae SABC2 (*192) 19:00
Toe Dorette Potgieter (44) hoor sy het die kans om die rol van Annalien in die tweede seisoen van Swartwater (seisoen 1, 2014) te vertolk, wou sy dit nie deur haar vingers laat glip nie. Nie net moes sy die rol by Annie Malan oorneem nie, maar dit was ook ’n gulde geleentheid om haar staal as aktrise te toon met ’n emosioneel-belaaide rol – Annalien, die bullebak Philip Steyn (Dirk Stoltz) se trofeevrou wat in ’n inrigting beland.
“Met Annalien kon ek wys daar’s ’n ander kant aan my,” sê Dorette, wat met haar wilgerlatlyf meestal die rol van ’n verleidster of mannejagter vertolk, soos die sexy diepdekkingsagent Sandra Cilliers in Vloeksteen 1 en 2 (kykNET, 2012 en 2013). En Dorette se sensitiewe en oortuigende vertolking van die gefolterde Annalien laat kykers nou regop sit.
MA’S WAT SAAMSTAAN
Toe sy gevra is om die rol oor te neem, was Dorette eers huiwerig. Dit het beteken sy sou aan en af weg wees van haar huis in Vredehoek, Kaapstad, en haar dogtertjie, Lia Luna Li (7), terwyl die 26 episodes oor ’n tydperk van vyf maande in Arniston in die Wes-Kaap en ook in Johannesburg verfilm is. “Ek is ’n enkelma, en dit sou beteken iemand anders moet Lia versorg.” Die blondekoppie is gebore uit die vyf jaar lange verhouding tussen Dorette en die sanger Riku Lätti.
Ná deeglike oorweging het Dorette besluit om dit te laat werk. “Gelukkig is ons ’n groep enkelma’s in my omgewing wat mekaar ondersteun, en my vriendinne Nicolette Reyneke en Lauren Basson het in my afwesigheid na Lia omgesien. Sy het ook in die vakansietyd by haar pa, wat in die Strand woon, gaan kuier.”
Dit was vir Dorette moeilik om die oulike Lia, wat nes haar ma gereeld model- en advertensiewerk doen, agter te laat. “Lia het in die aande na bande van my stem geluister om aan die slaap te raak.”
LEWENSERVARING
Die rol van Annalien kom op die regte tyd in haar lewe. “Ek twyfel of ek Annalien op ’n jonger ouderdom sou kon speel. Ná 40 bereik ’n mens ’n rypheid en het jy lewenservaring waaruit jy kan put om ’n emosionele rol met soveel substansie te speel,” sê sy.
Annalien het ná jare se misbruik en mishandeling deur haar manipulerende man ’n baie swak selfbeeld. Dorette het ook al ’n paar sakke sout opgeëet. “Ek is nooit in my lewe geslaan nie, maar is wel op ander maniere misbruik en kon uit daardie seerkry delf,” sê Dorette.
Annalien is ’n karakter met vele lae. “Wanneer Annalien in die inrigting beland ná sy vir poging tot moord op Philip aangekla is, besef sy sy het haar hele lewe in ’n valse waarheid geplaas. En ironies, tussen al die mense met geestesiektes kyk sy vir die eerste keer objektief na haar situasie,” vertel Dorette.
Nadat Annalien in die inrigting verkrag is en ontdek sy is swanger, raak sy vreesbevange, want sy besef sy is nie opgewasse om ’n ma te wees nie. Maar alles is darem nie hopeloos nie. “Daar is wel hoop vir Annalien,” sê Dorette. “Haar versoening kom op die ou end in ’n nuwe wêreld wat sy vir haarself skep.”
HOOP VIR TIENERS
Ma-wees en toneelspeel is nie al waarmee die veelsydige Dorette besig is nie. Buiten advertensiewerk bied sy ook slypskole in film- en TV-produksie asook kreatiewe teksskryfkursusse aan, hoofsaaklik vir jong mense. “Ek het ’n passie vir jong mense en wil ’n verskil in veral tieners se lewe maak.”
Dit het begin toe Dorette in 2015 by die Korrektiewe Dienste se opheffingswerk betrokke geraak het, en ’n program, Restorative Justice, onder leiding van die predikant Jonathan Clayton vir Hope Ministries waargeneem het. Sy werk tans aan ’n nuwe projek in digitale filmproduksie, met die samewerking van FILM (Film Industry Learner Mentorship), vir die Korrektiewe Dienste in die Wes-Kaap. “Ek wil jong mense ’n stem vir die toekoms gee. Ek wil hulle leer om hul stories te skryf en om ’n nuwe selfbeeld en liefde vir jou Skepper te vind,” vertel Dorette.
Nes met die karakter Annalien se gebroke lewe, glo Dorette die negatiewe kan in iets positiefs verander.