Kry jou regrukker
Ons kan ons oë nie wegskeur van The Fixer se kombinasie van geheime, skandale en styl nie.
The Fixer Seisoen 1 Maandae e.tv (*194) 20:30 (vanaf 17 April)
Om “fopnuus” of “alternatiewe feite” te skreeu wanneer ’n politikus op reusagtige skaal aanjaag, bluf niemand nie. Dit verg ’n kunstenaar om ’n politieke skandaal met verfyndheid uit te stryk. In The Fixer (2012-nou – en pas hernu vir ’n sewende seisoen) is die kunstenaar die Withuis se voormalige direkteur van kommunikasie Olivia Pope (Kerry Washington), wat die politiek verlaat het om haar krisisbestuursonderneming, Pope & Associates, op die been te bring. Haar span spesialiste sluit die prokureurs Harrison Wright (Columbus Short) en Stephen Finch (Henry Ian Cusick) in, asook die ondersoeker Abby Whelan (Darby Stanchfield), die tegnologiekenner Huck Muñoz (Guillermo Diaz), en die nuweling Quinn Perkins (Katie Lowes). Die span is gereed om Olivia te help om krisisse toe te smeer, die kompetisie te beswadder en selfs bewyse en lyke te begrawe. As jy eers jou krisis na Pope & Associates gebring het, kan jy dit beskou as diskreet “gehanteer”.
DIE REGTE OLIVIA POPE
The Fixer is geïnspireer deur die lewe van die gewese Withuis-persassistent Judy Smith (sonder die affair met die president, natuurlik). Al wat dit geverg het, was ’n 15 minuut lange ontmoeting wat ’n twee uur lange gesels geword het om The Fixer se uitvoerende vervaardiger, Shonda Rhimes, te oortuig ’n reeks oor ’n Judy-styl heldin sou TV-kykers se wêreld skud. Judy werk tans as ’n konsultant en medevervaardiger aan die reeks. “Ek verskaf krisisidees en stuur dit na Shonda. En sy sal bel en sê: ‘Wat dink jy hiervan?’ Ek lees elke draaiboek en stuur vir hulle notas. Dis lekker,” sê Judy. Sy adviseer ook oor protokol vir staatsbankette en ander tegniese detail in die Withuis, tot wat sou gebeur tydens ’n sluipmoordpoging op die president.
FIXER-STYL
Dis nie net Judy se fantastiese loopbaan waaruit die reeks put nie. The Fixer-fans geniet ook Olivia se kleredragkeuses. Hulle laat haar uitstaan in Washington, wat die reputasie van ’n somber stad het. [Vergelyk die realiteitsreeks The Real Housewives Of Potomac (2016-nou) met The Real Housewives Of New York (2008-nou) as jy twyfel.] Judy verklap iets van Olivia se styl. Sy was eendag in die bank toe ’n medekliënt haar op en af kyk en sê: “O, dit lyk soos ’n Olivia Pope-jas.” En Judy deel Olivia se gunstelinguitrustingkleur – wit.
WIT HOEDE = GOEIE OUENS
The Fixer se kostuumontwerper, Lyn Paolo, verduidelik sy klee Olivia gereeld in wit en bleek kleure, want: “Ek wil hê sy moet ’n baken van lig wees.” Sy voeg by: “Dit het begin as bloot ’n visuele ding en dit het ontwikkel tot iets oor vroulikheid. Ons wou nie hê sy moet soos ’n man aantrek nie, maar ons wou hê sy moes die broek dra. Sy dra nie ’n romp nie behalwe as dit ’n terugflits is, want ek het net gedink dis vervelig. Waarmee ons dus gespeel het, is die kleur, die palet en die sagtheid van die materiale. Sy dra struktuur, maar die materiale is altyd wonderlik gedrapeer.”
Maar ons dink daar is ’n ander rede waarom wit Olivia se gunstelingkleur is – dit kan die oog mislei. Wanneer Olivia soos ’n gloeilamp uitstaan, verblind sy ons oë sodat ons nie die onsmaaklike geheime sien wat sy die donker in smokkel nie . . .