Full Circle: Miami
Seisoen 1 M-Net (*101) 23:30 Drama
Full Circle (2013-nou) se stories in die seisoen van tien episodes verbind 11 karakters met mekaar, en hul betrokkenheid by ’n seksskandaal wat senator Davis Faulkner (Dougray Scott) se presidentsveldtog kan vernietig. Het hy regtig ’n foonsnol verkrag en vermoor? Wie kan sê! “Dit gaan oor die toesmeer van die skandaal en hoe hulle alles stilhou om seker te maak inligting word nie bekend nie sodat dit nie sy veldtog kan belemmer nie,” sê Dougray. “Dis ’n goeie ondersoek van morele waardes in die politiek. Gaan die politiek oor mense en om hul lewe te verbeter, of gaan dit oor mag, hoe jy daar kom en of die doel die middele regverdig?”
Die man met die warm binne-nuus is Christopher Gorham, wat die senator se geheimediens-agent Rick D’Andre speel. “Hy’s ’n ware patriot wat glo in wat hy doen. Hy glo heelhartig in die geheime diens en dis hoekom hy so gekweld is deur wat hy sien. Hy is ’n pot wat enige tyd kan oorkook,” sê Chris, wie se karakter sentraal in die aksie is. Christopher het die blinde CIA-agent Auggie Anderson in Cover Affairs (20102015) gespeel, maar ons kan die keer ’n ander vertoning verwag, want “om rond te kan kyk en ’n aanval te sien, is ’n groot deel van die geheime diens”, sê hy grappenderwys.
Voor die seisoen-première in die VSA in September 2016, het Christopher Long van die reeks se produksiemaatskappy AT&T aangekondig: “Jorge Zamacona se skryfwerk sal kykers na die wêreld van sameswering en politiek lok, wat perfek saamgaan soos ons ons presidentsverkiesingseisoen betree.” En soos kykers in Amerika die reeks in 2017 gekyk het, het gehore gewonder of ’n sameswering so eenvoudig ’n uitwerking op verkiesingsuitslae kan hê.