DIENUUS HIER VOLG
Die produksienetwerk HBO het fans voor Game Of Thrones (2011-nou) se seisoen 7 in Julie ’n voorsmakie gegee met foto’s van karakters in hul nuwe uitrustings. Die treffendste is Khaleesi Daenerys Targaryen (Emilia Clarke), wat haar babablou rokke vir ’n magtige, oorlogtipe militêre baadjie verruil het. Fans wat gehoop het die Top Gear- (2002-nou) aanbieder Matt LeBlanc sal weer met sy Friends- (1994-2004) medester David Schwimmer saamwerk, kan dit voorlopig vergeet. David het hom aan alle werkverpligtinge onttrek weens die verbrokkeling van sy huwelik met Zoe Buckman, sy vrou sedert 2010 en die ma van sy vyfjarige dogter, Cleo. Zoe Perry hou die familietoneelspelbesigheid aan die gang. In 2016 het sy die rol van Samantha in die politieke drama The Fixer (2012-nou) vertolk saam met haar pa, Jeff, wat al sedert seisoen 1 Cyrus Beene speel. Nou het Zoe die rol gekry van die jong Mary Cooper in Young Sheldon (2017), die splinterreeks van The Big Bang Theory (2007-nou). En wie het die ouer Mary in die oorspronklike reeks gespeel? Zoe se ma, Laurie Metcalfe. “Dit was nes enige ander toneelspelwerk,” sê die 33-jarige Zoe. “Ek het ’n oudisie afgelê en die rol gekry. Ek het saam met my ma gerepeteer om Mary se Texas-aksent reg te kry.” Oprah Winfrey, TV se kletskoningin, gaan in die afsienbare toekoms haar eerste verskyning in die paneelgeselsprogram The Talk (2010-nou) maak. Hoewel ander onderwerpe beslis sal opduik, is fans opgewonde oor die nuus dat Oprah eksklusief met aanbieders soos Julie Chen, Sara Gilbert, Sharon Osbourne, Aisha Tyler en Sheryl Underwood sal gesels oor haar nuwe fliek The Immortal Life Of Henrietta Lacks, en haar rol as “spesiale korrespondent” in die langdurende nuusprogram 60 Minutes (1968-nou). So gepraat van aanbieders van The Talk, Julie Chen is op pad na die sepie Y&R (1973-nou) waarin sy ’n gasster gaan wees. Sy gaan haarself speel. Al is die storielyn steeds ’n geheim, kan ons verklap Hilary (Mishael Morgan) gaan na Hollywood reis om ’n onderhoud te voer met haar ikoon – Julie Chen – vir die fiktiewe skinderkoerant Genoa City Buzz. Adolfo (A) Martinez en sy karakter Eduardo verlaat Days Of Our Lives (1965-nou). Die akteur, wat sedert 2015 in die sepie speel, sê: “Omdat Eduardo uitgeskryf is in Days, wil ek my dankbaarheid betuig teenoor almal wat hom – en my – ondersteun het.” Hy vertrek weens produksiebotsings met sy roosters (hy werk ook aan twee ander programme), maar voeg by: “Ek sal altyd bereid wees om eendag terug te keer as die reeks en die fans my wil terughê.” SA fans sal hom nog tot 2020 sien, want ons is drie jaar agter die VSA-uitsendings. En as jy nog nie moeg is vir die Kardashians op omtrent elke liewe kanaal nie, die jongste dogter, Kylie Jenner, het ’n eie realiteits-splinterreeks, Life Of Kylie, gekry. Die vermaakkanaal E! het die agt episode lange reeks goedgekeur. Dit sal “fans ’n binnekykie gee na Kylie se persoonlike lewe, projekte waaraan sy werk, asook die tye wat sy saam met haar pelle deurbring,” sê ’n woordvoerder. Jy sal die model Jordyn Woods ook daarin sien, behalwe as jy glad nie na die Kardashians se manewales kyk nie en verkies om eerder buite te gaan speel.