Skat, ek’s terug
Die wegholbruidegom Damon Bradbury is terug vir liefde en wraak, maar veral liefde.
Damon Bradbury (Craig Urbani) het van sy spoggerige troue met Yvonne Thebe (Kgomotso Christopher) gevlug op Donderdag 9 Februarie met sy reputasie aan flarde en sy verlate bruid al huilende en tandknersend van woede. En die polisie was kort op sy hakke weens vervalste dokumente wat hom by ’n skelm wapentransaksie betrek, wat die geslepe Siseko Langa (Hlomla Dandala), sy mededinger om Yvonne se hart, vir Romeo (Hungani Ndlovu) gekry het om te vervals. Al daardie sakekonneksies wat hy na die troue genooi het om te spog het ’n storm losgeskinder, en met elke media-uitreiking in Suid-Afrika (insluitend tvplus) het hulle hul verlustig in die skokstorie en -foto’s. Maar wanneer Damon op Woensdag 26 April terugkeer, stel hy sy familie eerste. Craig onthul: “Die eerste ding waaraan hy dink, is om Yvonne en sy suster Layla (Natasha Sutherland) weer te sien.”
EK’S TUIS!
Damon wil voorkom dat die deur in sy gesig toegeslaan word op Donderdag 4 Mei. “Hy is bekommerd hy gaan ’n verlore Yvonne in ’n hoop op die vloer aantref. Hy koop die hotel-ontvangsafdeling om, en wanneer sy inkom, lê hy op haar bed – ta-da!” sê Craig laggend. “Sy is eers geskok, dan opgewonde en dan raak sy kwaad,” voeg hy by. Omdat hy teen sy skuldgevoelens baklei, besef Damon nie hoe vreemd stil Yvonne se reaksie is nie. “As sy ’n skoon gewete sou hê, sou sy anders reageer. Maar omdat daar dinge is wat sy wil hê weggesteek moet bly, kan sy hom dalk minder erg laat boet as andersins,” verklap Craig. Nadat hy uit Yvonne se kloue ontsnap het, vertel Damon vir Layla hy is terug om uit te vind wie hom na die skuldige laat lyk het en hoekom, en op Maandag 8 Mei konfronteer Damon sy eerste verdagte. Maar hy is oorgehaal om dinge met Layla en sy neef Quinton (Brighton Ngoma) reg te stel – deur in NFH te belê. “Dis ’n uitstekende belegging om sy naam as ’n goeie sakeman in ere te herstel, maar dis ook ’n kans om sy goeie naam terug te kry by die mense wat saak maak,” sê Craig. As Damon maar weet sy vertroue in minstens een van die mense is hopeloos misplaas . . .