Pa die bekruiper
Puleng wil ontslae raak van haar eksminnaar Themba wanneer sy bewyse kry hy is ook haar bekruiper.
Rhythm City Weekdae e.tv (*194) 19:00
Die swanger Puleng (Tebogo Khalo) is vreesbevange op Woensdag 26 April wanneer haar wasgoed wegraak. Dit beteken die bekruiper wat haar sedert Vrydag 21 April volg, kom nader. Sy wil dit by die polisie aangee, maar haar swaer en die pa van haar ongebore baba, Themba (Sphamandla Dhludhlu), keer haar. “Hy vertel Puleng sy het geen bewyse om die bekruiper te laat arresteer nie,” sê Tebogo, en Themba bied aan om haar te beskerm. En ter wyl Puleng by haar “lyfwag” aanpas, glo haar vervreemde man, Suffo (Mduduzi Mabaso), se gewese eerste vrou, Niki (Nolo Phiri), nie vir Themba wat op Vrydag 28 April maak of hy die goeie ou is nie, en sy konfronteer hom dat hy die bekruiper is. “Hy neem aanstoot. Themba kan sy geslepe maniertjies goed wegsteek en Puleng weet dit nie,” voeg Tebogo by.
EK HET JOU!
Puleng is bereid om saam met haar swaer as haar persoonlike beskermer ’n gelukkige gesin te speel as die baba eers daar is, maar op Maandag 1 Mei vind sy toevallig haar onderklere in Themba se baadjie. “Sy is woedend! Puleng dink hy’s gek en glo haar lewe is in gevaar,” verduidelik Tebogo. ’n Bekommerde Puleng vra Suffocate op Woensdag 3 Mei om van sy broer ontslae te raak, maar, “Suffo is verward. Hy wil help, maar wil nie nader aan Puleng kom as hy met sy broer wat sy vrou swanger gemaak het, te doen kry nie,” sê Tebogo. Puleng het Suffo in September 2016 met Themba verneuk toe sy en Suffo gesukkel het om swanger te raak. “Suffo verduidelik aan Puleng hy sal help, maar hy bou eintlik ’n nuwe lewe saam met Niki,” sê Tebogo.
RED MY
Puleng is raadop om van Themba ontslae te raak op Dinsdag 9 Mei, maar hy is vasbeslote om haar naby hom te hou. “Themba vra Puleng om by hom in te trek en wanneer sy weier, sluit hy haar in sy huis toe,” sê Tebogo. Hy hou Puleng gyselaar en die hoogswanger vrou is oorangstig oor haar baba, wat oor ’n paar dae gebore word. Tebogo voeg by: “Themba wil Puleng nie verloor nie en dit maak hom waansinnig.”