Vlytige vingers
Tien kreatiewe deelnemers ding mee om een titel.
Kunsvlyt Seisoen 1 Vrydae kykNET (*144) 18:00
Bobaas-kokke en baasbakkers het al ’n paar keer kans gekry om hul vernuf en vaardighede in realiteitsreekse soos Kokkedoor (kykNET, 2013 en 2015) en Koekedoor (kykNET, 2014 en 2016) te wys. Nou is dit die kunsvlyters se beurt om hul skeppingsvermoë te toon. “Die deelnemers kry die kans om hul vindingrykheid vir kykers te wys,” sê die vervaardiger, Berné Grobler van die produksiemaatskappy TakeHeart Productions. Hulle kry elke week vir 13 weke ’n nuwe uitdaging: Hulle moet kunsprojekte van nuuts af skep met enigiets van klei, papier en hout tot plastiek, mosaïek, teëls en tou.
OPDRAG EN ’N EIE WINKEL
Die tien deelnemers van regoor die land is uit 220 inskrywings gekies. Hoopvolles moes iets maak, ’n foto daarvan instuur en hoop hul kreatiwiteit kry hulle op die kassie. “Vir die opdrag kon hulle net sekere produkte gebruik, soos gom, tou, verf en plakboekpapier, sowel as enige herwinbare artikel,” vertel Berné.
Voor die verfilming moes daar, net soos vir Kokkedoor en Koekedoor, ’n spesiale voorraadkamer vir die deel- nemers ingerig word. Berné vertel die hoofborg, PNA, het ’n replika-winkel by die Casa Lumini- gastehuis in Carletonville, waar die reeks verfilm is, gebou. “Hierin was enigiets van ’n hamer en spyker tot plastiek, glas en blikke, ’n verskeidenheid materiale en knope.”
DIE UITDAGINGS
Met elke uitdaging kry die deelnemers sowat tien minute vir beplanning. Daarna het hulle net een kans om al hul benodigdhede in die winkel te gaan haal. As hulle iets vergeet het, is dit neusie verby, vertel Berné.
Die uitdagings is beplan sodat dit binne die bepaalde tyd van sowat 2 uur uitgevoer kan word. “Dit het beteken hulle moes goed kies wat kon werk, soos gom wat betyds droog word. Die beoordelaars het wel in ag geneem dat sekere produkte, soos voegbry (vir mosaïek) en verf, nie betyds droog sou wees nie en die deelnemers is nie daaroor gepenaliseer nie.”
Omdat tyd so ’n groot rol speel, is die beplanning van kardinale belang. “Maar dis die deelnemers se vindingrykheid en kreatiwiteit wat op die ou end deurslaggewend is,” sê Berné.
Elke episode is iets nuuts. “Hulle kry ’n spesifieke basis waarvan hulle moet werk. Dis die verrassingselement van die reeks en daarom gee ons niks voor die tyd weg vir die kykers nie.”
BEOORDELAARS EN PRYSE
Die drie beoordelaars is Michelle Holtzhausen, redakteur van die tydskrif Creative Hobbies wat ook die aanbieder van die reeks is, die “Van-saai-na-fraai”foendi Almie Louis, en Trudie Ayres van Mulberry Lane. Daar word nie weekliks ’n deelnemer uitgeskakel nie – dit word as ’n verrassing vir die kykers gehou wanneer iemand uitval. Karel Willems, die enigste haan onder die henne, sê dit was eers ’n skok toe hy hoor hy’s die enigste doring tussen die rose. “Maar ons het gou soos familie begin voel en daar was geen ego’s nie.”
GROOT PRYSE
Vir die wenner wag daar onder meer ’n oorsese reis ter waarde van R50 000, wat ’n besoek aan die Faber CastellAkademie in Duitsland insluit.
Drie gelukkige kykers kan ook pryse van altesaam R34 000 losslaan (besoek www.kykNET.co.za vir inligting).
DIE DEELNEMERS
Die 10 deelnemers kom vanoor die hele land en al wissel hul beroepe, is die meeste van hulle in die kunswêreld bedrywig.
1 Adrienne van As (37) is ’n onderwyseres van Wellington.
2 Antoinette Jordaan (22) is ’n voltydse student van Potchefstroom en het haar eie aanlynbesigheid.
3 Erika Turvey (35) is ’n kunstenaar van Frankfort.
4 Karel Willems (39) is ’n kunstenaar van Fourways.
5 Ria Potgieter (54) is ’n tuisteskepper van Oudtshoorn.
6 Celia Kuschke (58) is ’n tuisteskepper van Pretoria.
7 Amanda Cliengen (56) is ’n kunstenaar van Kaapsehoop.
8 Anri Erasmus (25) is ’n kunstenaar van Centurion.
9 Denica Lottering (26) bestuur haar eie kunsonderneming en is van Durbanville.
10 Melinda van Biljon (44) is ’n finansiële bestuurder van Lyttelton (sy het in ep. 2 uitgeval).